Iphoyisa lomgwaqo kwelokubulala umngani
KUBOSHWE iphoyisa lomgwaqo ngezinsolo zokubulala umngani walo okuthiwa udubuleke ngephutha eMbali, eMgungundlovu izolo ekuseni.
UMnuz Sphelele Molefe (28) kuthiwa udubuleke ekhanda washonela esibhedlela, kwaboshwa iphoyisa nomunye umngani wabo abebehamba naye ngesikhathi kwenzeka lesi sehlakalo.
Isolezwe lithole ukuthi bebephuma endaweni yokucima ukoma khona eMbali ngesikhathi kwenzeka lokhu.
Umthombo weSolezwe osondelene nodaba uthe kusetshenziswe isibhamu sephoyisa kodwa kushone elayizolo kungakacaci ukuthi ngubani phakathi kwephoyisa nomngani eliboshwe naye odubule umufi.
Okuvelile wukuthi kukhona obekade edlala ngesibhamu sephoyisa kwabe sekudubuleka ngephutha.
Omunye umthombo ofike endaweni okwenzeke kuyona isehlakalo uveze ukuthi iphoyisa nomngani bebedakwe bengakwazi nokuma. Kodwa lokhu akuzange kuqinisekiswe amaphoyisa njengoba kusaphenyisiswa ngokwenzekile.
“Bekubukeka sengathi kade bephuza ubusuku bonke ngoba bebediyazela. Bebekhihla nesililo ubona nje ukuthi kwenzeke iphutha, bebengazitsheli ukuthi kukhona ozodubuleka,” kusho umthombo.
Okhulumela amaphoyisa KwaZulu-Natal, uColonel Thembeka Mbhele, ukuqinisekisile ukuthi kuboshwe ababili ngesehlakalo sokudutshulwa komuntu wathi bazovela enkantolo maduze. Uthe uphenyo luyaqhubeka.
Imizamo yokuthola umndeni kamufi ayizange iphumelele izolo.