Sikulungele ukuzivikela: Zikalala
USIHLALO we-ANC KwaZulu-Natal, uMnuz Sihle Zikalala, uthi abanavalo ngecala elifakwe ngabeseka owayenguNdunankulu waKwaZulu-Natal, uMnuz Senzo Mchunu elizongena kusasa eNkantolo eNkulu eMgungundlovu.
Uthe bazimisele ukuyoziphendulela enkantolo emuva kwalokho bagxile emsebenzini wokuhlanganisa i-ANC ehlakazwa yileli cala.
UZikalala uthe abakaze bacabange ukuthi bazokwenzenjani uma icala libalahla ngoba ayikho into ephambene nomthetho abayenza engqungqutheleni yokukhetha ubuholi be-ANC esifundazweni ngo-2015.
“Sikulungele ukuyozivikela futhi asiboni silahlwa yicala ngoba akukho okubi esakwenza. Umuntu owayenguSihlalo we-ANC KwaZulu-Natal nowayenguNobhala ngesikhathi sengqungquthela bayalazi iqiniso. Asikwazi ukuphawula ngokuthi sizokwenzenjani uma sihlulwa ngoba ngeke sihlulwe,” kusho uZikalala.
Ebuzwa ukuthi ngabe zikhona izinyathelo abazozithathela uMchunu njengoba esephumele obala wathi weseka iPhini likaMengameli wezwe uMnuz Cyril Ramaphosa ukuthi abe ngumengameli we-ANC engqungqutheleni yangoDisemba, uthe: “Azikho izinyathelo zomthetho esizozithathela uMchunu kodwa akukhulumile sizokuhambisa emagatsheni e-ANC ukuze akudingide,” kusho uZikalala.
Kuze kwashaya isikhathi sokushicilela uMchunu engatholakalanga ukuba aphawule.
Obambe ucingo lukaMchunu uthe usemhlanganweni, wathembisa ukuthi uzophendula uma esephumile kuwona. Nomqhafazo awuthunyelelwe kushaye isikhathi sokushicilela engawuphendulanga.
UMchunu ucashunwe emithonjeni yabezindaba ngempelasonto ethi akusho lutho ukuthi ubani ophumelelayo. Ubuze ukuthi kungani kuze kube wukuthi uma kukhona ukungaboni ngaso linye kwi-ANC kumele isixazululo siqhamuke nenkantolo okuyinto eveza ngokusobala uqhekeko kule nhlangano?
UMnuz Thabani Khumalo ongumhlaziyi wezepolitiki ozimele uthe ukuvunwa kukaMchunu yicala kungasho ukuqala phansi kothuthuva kule nhlangano.
“Kungasho ithuba lokuziphindiselela kohlangothini lukaMchunu. Bangafuna kubuyiswe bonke abakhishwa njengoMnuz Mike Mabuyakhulu nabanye,” kusho uKhumalo.
Uthe lokhu kungaphinde kusho ukuthi kumele kuchithwe izifunda, amagatsha namakhansela asebekiwe.
“NeKhabhinethi kungamele ihlakazwe, okuyinto engasho ukubuyisela izinto emuva,” kuchaza uKhumalo.
Uthe kungabe kuchaza ukuthi obekwenziwa yisigungu esikhona manje bekungekho emthethweni.UKhumalo uthe noma ngabe inkantolo ivuna uhlangothi lukaZikalala lokho akusophinde kulubuyise ubumbano kule nhlangano.
“Ngeke kusaba lula ukuthi kube khona olalela omunye kwi-ANC. Kuzofana nengane efike nenkosikazi emshadweni okuthi uma uyise eyilawula ithi uyayihlukumeza ngoba nakhu ingazalwa uyena,” kusho uKhumalo.
UMnuz Lukhona Mnguni naye ongumhlaziyi wezepolitiki uhambe emazwini kaKhumalo.
Uthe noma umphumela ungavuna noma iluphi uhlangothi kodwa i-ANC KwaZulu-Natal izoya okhethweni lokukhetha ubuholi ngoDisemba ihlukene phakathi.
“Ayisophinde ifane no-2012 okhethweni lwaseMangaung lapho u-95% wezithunywa zale nhlangano ezazivela KwaZuluNatal zavota ngokubambisana.”
Uthe ukuvunwa kohlangothi oluthile kumele kumhluphe uMchunu azibuze ukuthi kusho ukuthini ukuhlukana kwenhlangano ngesikhathi sakhe esengusihlalo wayo.
Uthe okungalindelwa wukuthi isinqumo ngeke siphume maduzane. Ubeke uFebhuwari wonyaka ozayo njengesikhathi okungaphuma ngaso isinqumo esingujuqu ngaleli cala ngoba izinhlangothi zombili kungenzeka ziwudlulisele phambili umphumela oyokhishwa yinkantolo.