Sukuma uma unesiyezi, iphika nokukhathala
Empeleni umzimba wonke usuke usudikibele sewenza kukhathale wonke amalunga nezicubu zawo. Iningi leziguli esizibonile belivuvukele kakhulu kwabanye ukuvuvukala bekuze kufike enkabeni. Iziguli bekungabesimame abebevela ezikhungweni zempilo ezehlukene beyofuna kuzona usizo. Bebesitshela ukuthi ezibhedlela kuthiwe mababuye ngenyanga ezayo ukuze bezongena emshinini wamafutha.
Okungimangalise kakhulu ukuthi isimo sabo besibucayi. Bebengabantu abadinga ukulandelwa eduze ngokubelapha, benephika ebelimandla nesiyezi. Yinyanga yabesifazane lena kodwa ukunganakekeleki kwabo kulokhu kukhona njalo kwezempilo. Njengenjwayelo siye sabafaka emshinini i-ECG. Imiphumela esayithola yaveza ukuthi izinhliziyo zabo ziyangqabashiya ngokungalawuleki (Atrial Fibrillation). Yisimo esibuhlungu lesi nesithe phecelezi ngoba inhliziyo ekulesi simo ayibe isalikhipha igazi elanele bese umzimba uyakhathala, uqhaqhazele, isiyezi sithi ngilapha, ikhanda elibuhlungu, ukuqumbelana, ukungadli abanye baze baphalaze.
Namhlanje ake sibheke ubungozi benhliziyo eshaya ngamandla engasalawuleki (Atrial Fibrillation). Umsebenzi wenhliziyo wukukhipha igazi elanele liye emzimbeni ngaso sonke isikhathi. Lokhu kwenzeka uma inhliziyo ishaya kahle ingaphumi esipolweni. Inhiziyo ithi ingaphuma esipolweni bese ihluleka ukukhipha leli gazi. Cabanga ke inhliziyo evele ingenamandla ngenxa yobuthaka bayo bese ukugula kwengezwa wukuphulukundlela kwayo esipolweni. Iziguli zivele zicinane kakhulu, ziphelelwe amandla, isiyezi sibhilite sindlaleke umzimba wonke. Usho kanjani kumuntu ogula kanjena ukuthi akabuyele ekhaya aze eze emshinini emasontweni amahlanu alandelayo? Kwenzeka kanjani lokhu?
Ivangeli lanamhlanje, ngiyaphinda ngithi masizinake lezi zimpawu. Asingavumi ukuba nesiyezi esingazi ukuthi sivelaphi, sibe nokucinana esivele sikuphuzele amanzi. Inhliziyo efeyilayo igcina yenze kwagcwala okusamanzi emaphashini kube nzima ukuphefumula. Okusamanzi akugcini emaphashini kodwa kuwelela nasesibindini. Ukusuka lapho amanzi ansondo agcwala emilenzeni nasezinyaweni. Ogulayo useyobitoza, ahluleke ukuhamba, kungalaleki, afake imiqamelo uma ezama ukubeka uhlangothi abanye balala behlezi imbala.
Lesi simo sengezwa wukuthi asisheshi sisukume siye kodokotela. Siqala sihlanganise lokhu nalokhuya ngaphambi kokuyofuna usizo oluqondile. Masinganqeni ukusukuma siye kodokotela ukuze sihlolisiswe. Abantu bakithi baba manqikanqika ukukhokha kudokotela uma umuntu sekumele ahlolisiswe ngendlela. Uthola ukuthi kwezinye izindawo esiya kuzona kulula ukukhipha imali eshisiwe yokuqinisa umuzi njalo njalo kodwa kube lukhuni satshe ukukhokha kudokotela othenga imithi, othenga imishini aphinde akhokhele ukuyigcina isebenza. Uyaye uzwe abantu bebala zonke izinkinga uma sekuya ekukhokheleni impilo yabo.
Umshini i-ECG ubalulekile. Uma usugula kumele uyenze kaningi i-ECG kuncike ekuguleni kwakho. Ngake ngasho ngathi ukuhlolelwa iBP ngomshini wayo akwanele ngoba usuke ungazi ukuthi inhliziyo yenzani ngomfutho wayo ophezulu. Yilokhu kungazihlolisisi okwenza sifike kodokotela sesigula kakhulu sekuhlangene inqwaba yezifo. Mangibuyele ezigulini engikhulume ngazo ebezifike zigula kakhulu. Zonke zihambe sezihlengiwe sezingcono kakhulu zabuyela emakhaya.
Mpilonhle Mpilonde!