Akungacashwa ngothando kubulawana
MHLELI: Ngithi ake ngibeke umbono wami ngodaba oluphume ngo-Agasti 10, 2017. Ngicela ukukubeka kucace ukuthi seziningi izigigaba ezifuze lezi zokubulawa kwabantu yizithandwa zabo esizifunda emaphephandabeni. Esikhundleni sokuthi zinciphe ziyanda. Mina ngiyazi ukuthi siyini isizathu sokuthi zande nsuku zaphuma.
Sonke isikhathi kuye kuvele noma kubhalwe ukuthi ubulale isithandwa sakhe ngoba ubesithanda kakhulu. Njengaleli phoyisa elidubule uzakwabo ngoba bese laliwa.
Inkinga ukuphendukezelwa kwenkulumo nje kuphela. UNjabulo Khomo ubezizonda izingane zakhe nonina wazo ubengazifuni nalapho zihambe khona... kanjalo nephoyisa uSfiso Aya Sibiya ubengamfuni uSthabiso Mpanza. Akekho umuntu obulala omunye ngoba emthanda kuze kweqe noma egameni lokuthi uyamthanda.
Ngizama ukuqwashisa bonke labo abathi bayathandana kepha omunye aze akholwe kanti omunye uthi ‘lala lulaza sizokwengula. ‘
Ngokwami ngithi wonke umuntu osothandweni akaqaphele ama “e-mail angamanga“izwe lingabhubha liphele nya ngenxa yawo, sikubonile lokho ePhalamende. Naye lo bhuti ubenza sengathi uyazithanda izingane zakhe kanti lutho. Qala ngokubona izimpawu zokuhlukumezeka uzobona ukuthi le ndlela ibheke kuphi. Akukho sikhwele lapha esingaze sithi thatha isibhamu ubulale ngoba usekwalile wena umthanda ukwedlula wonke umuntu. Wake wakuzwaphi lokho? Ngakho bafowethu nodadewethu masingakhohlisani masivule amehlo othandweni lwethu siluqaphelisise ubusuku nemini, sisheshe silibone ukuthi libheke kuphi. Akekho umuntu ongaze abulale omunye ngoba ethi uyamthanda.
Azisekho emhlabeni izingane (iziphohlongwane) ezinhle kangaka uThando Khomo noSibonelo Khomo ngenxa yenhliziyo embi noSathane nenzondo kaNjabulo Khomo obenza sengathi uyazithanda kanti .... Nilale kahle bodado. Siyonikhumbula noma singanazi. CS Madela OLUNDI