I-ANC ihlulekile ukuhola abantu, kusho uCele
IPHINI likaNgqongqoshe wezoLimo nokuDoba, uMnuz Bheki Cele, uthi uzoqhubeka nokumela iqiniso nobulungiswa kwi-ANC.
UCele, obekhuluma namalungu amagatsha ahlukahlukene e-ANC eMlaza ngeSonto, uthe icala le-ANC eliya enkantolo eNkulu yaseMgungundlovu kusasa akulona elabathile kodwa lithinta i-ANC ehluleke ukuhola.
Uthe isigungu esiphezulu se-ANC sihlulekile wukuhola abantu futhi yisona esiholele ekutheni amalungu enhlangano agqigqe ezinkantolo.
“Ngo-2007 salwa saze saphuka izandla silwela ubulungiswa nemigomo nokuthi kulandelwe imigomo ye-ANC. Sasilwela ukuthi iPhini likaMengameli lingene esikhundleni sokwengamela i-ANC njengoba kungumgomo we-ANC, namanje sisakholelwa kulokho.”
Uma kuya ngombono kaCele, lokhu kusho ukuthi nguMnuz Cyril Ramaphosa okumele angene kwesokuhola i-ANC.
Ilungu le-ANC elisondelene noCele kodwa elingathandanga ukudalulwa lithe, ukhuluma kanje ngenxa yokuthi uneqiniso futhi akasabi ukuthi angase aqondiswe ubugwegwe.
“UCele uyilungu lesigungu esiphezulu se-ANC akushoyo kuyiqiniso. Kuzokhumbuleka ukuthi uke wathula engasho lutho emphakathini kodwa manje usebuyile uyazikhulumela njengoba engaseyena umkhuzi wamaphoyisa,” kusho ilungu.
Lithe uCele ubekhuluma ngezingqinamba ze-ANC kwisigungu esiphezulu kodwa ngenxa yokuthi akawuboni umehluko usekhethe ukukhuluma emhlanganweni wamagatsha ahlukahlukene.
Likugcizelele ukuthi uCele akalweli indoda ethile kodwa ulwela iqiniso njengoba wayenza ePolokwane ngo-2007.
UCele uthe abantu bagqigqa emajajini ngenxa yokuthi isigungu esiphezulu se-ANC siyahluleka wukuxazulula izinkinga zenhlangano.
Uvumile ukuthi i-ANC ihlukene phakathi esho nokuthi nesigungu esiphezulu i-top six sihlukene futhi akuseyona i-ANC ka-Oliver Tambo lena.“Uma siqhubeka nokunganilaleli kufanele nisihambise ezinkantolo. Yenzani lokhu kuze kufike isikhathi sokuthi sinilalele, sibe ngabaholi abaqotho kini. Ngiyathemba ubuholi obusha besigungu esiphezulu buza nobuqotho ukuze abantu bangathembeli ezinkantolo.”