Sizobathola abavote namaqembu aphikisayo: Magashule
UNDUNANKULU waseFree State, uMnuz Ace Magashule, uthe bazowathola amalungu e-ANC avote namaqembu aphikisayo ngesikhathi kunevoti lokungabethembi ubuholi bukaMengameli Jacob Zuma ngoLwesibili olwedlule.
Ekhuluma emhlanganweni we-ANC yaKwaZulu-Natal neyaseFree State uMagashule uthe bazowathola amalungu ngoba bazokwenza uphenyo oluhlanganisa izivivinyo zokubheka ukuthi aqamba amanga noma akhuluma iqiniso.
“I-DA eMogale City iphoqe amalungu ayo ukuthi ahlolwe ukuthi akhuluma iqiniso, nathi kumele senze njalo uma sifuna ukuthola amalungu alwa nomzabalazo. Akhona amalungu e-ANC esiwaziyo ukuthi kawahambisani nemigomo ye-ANC abhala ezinkundleni zokuxhumana futhi akhuluma nabezindaba. Kufanele aqondiswe ubugwegwe,” kusho uMagashule.
Uthe beze KwaZulu-Natal nesigungu sakhe ukuzoxoxa ngemigomo ye-ANC nokwesekana uma sekuyiwa engqungqutheleni yobuholi ezoba ngoDisemba.
Yize beluxoxile udaba lwengqungquthela yangoDisemba kodwa uMagashule uthe abalikhiphanga igama lomholi abahambisana naye, bazoze balisho ngoSepthemba uma sekuvulwa isikhathi sokuthi bakhethe abaholi.
Bekukhona noNgqongqoshe weziMayini, uMnuz Mosebenzi Zwane, oze wamoyizela uma uSihlalo we-ANC KwaZulu-Natal ethi bayazeseka izinhlelo zakhe zokufaka abantu abamnyama ezimayini.
UZikalala akathandanga ukuxoxa ngodaba lokuqondiswa ubugwegwe kukaDkt Makhosi Khoza oyilungu le-ANC.