Uzifela ngo-Amla owine umqhudelwano iLet’s Play
UKUBA nothando olujulile lomdlali oyisithandwa eqenjini lesizwe lakuleli amaProteas, uHashim Amla, yikhona okutshale imbewu yekhilikithi kumfana omncane waseNgwelezane, uJose SSerwanga, okunguyena obaqwaqwade bonke emakhanda ngoMeyi waqokwa njengovelele kwiLets Play.
Lokhu kutshelwe Isolezwe unina kaJose, uNomvula Nyawo, obekhuluma naleli phephandaba muva nje ngesikhathi livakashele esikoleni okufunda kusona uJose iSaint Cathere’s School eMpandeni. UJose (7) ufunda u-grade 1 kulesi sikole kanti usezakhele olukhulu udumo ngekhilikithi.
“Angingabazi ukuthi uthando lwakhe lwekhilikithi luqhamuke ekuzifeleni kwakhe ngo-Amla. Uyizwa ngaphakathi le nto ayenzayo. Angabukeka sengathi unamahloni manje kodwa uma esedlala nami ngizizwa ngihloniphekile uma abanye omama bezingane sebemncoma. Ungumfana ozithobile futhi esikoleni wenza kahle ngakho-ke anginawo amandla okumncisha into ayithandayo ekubeni nami ngibona ukuthi uyizwa ngaphakathi,” usho kanje unina kaJose umbona ngisho ebusweni ukuthi uyaziqhenya ngendodana yakhe.
Ngesikhathi Isolezwe litheleka esikoleni sikaJose, ulandwe kude lapho ebematasa khona eziqeqesha okukubeka kucace ukuthi umfana unekhono. Ngokweminyaka usemncane ukuthi usengadlalela izikimu ezinkulu zesikole kodwa ngendlela abamuchaza ngayo ngeke kube yinkinga lokhu uma iminyaka isimvumela. Ezikhulumela yena uJose, uvumile ukuthi ukuthanda kwakhe u-Amla yikhona okumenze wakhetha ukugxila kakhulu ekubhetheni yize ekhona nasekushwibeni. “Ngithanda kakhulu ukuthi abangani bami bahlale njalo bethi-wow uma ngishaye u-6. Lokhu kuyangikhuthaza futhi kuyangijabulisa uma ngidlala. Ngijabule kakhulu ukuthi umama ukhona la njengoba ehlale ekhona njalo uma kudlalwa,” kusonge umfana. Unina uthe uma isenkundleni indodana, abangani bamemeza bathi: Jose, Jose, Jose.