Ugxeka abaholi beqembu lakhe
OWAYENGUMHOLI we-DA KwaZuluNatal, uMnuz Sizwe Mchunu, ugxeka abaholi beqembu lakhe asebekhuluma ngengqungquthela yokukhetha ubuholi besifundazwe ezoba ngoDisemba nonyaka.
Ebuzwa izolo ukuthi uzolungenela yini ukhetho, uMchunu uthe ngeke akwazi ukuphawula ngezindaba zengqungquthela okwamanje ngoba lokho kuphambene nemigomo yeqembu.
UMchunu uthe kuseva ukuthi sekungakhulunywa ngengqungquthela, wengeza ngokuthi kusenezinhlelo zangaphakathi eqenjini ezilandelwayo njengokucwaningwa kobulungu nokugcotshwa kwamagatsha.
“Kungithusile ukubona abanye abantu bekhuluma ngengqungquthela yeqembu yesifundazwe kwabezindaba. Lokho abakwenzile kukhombisa ukungayihloniphi imigomo yeqembu,” kusho uMchunu.
Yize uMchunu engazange abize amagama abantu kodwa bakhona abaholi be-DA asebeqalile ukuphawula ngengqungquthela. Phakathi kwabo kubalwa uMholi weqembu esifundazweni, uMnuz Zwakele Mncwango, noMkhulumeli wenhlangano esiShayamthetho KwaZulu-Natal, uNksz Mbali Ntuli.
Ngempelasonto engxoweni neSunday Tribune esesitebeleni esisodwa neSolezwe, uMncwango uthe ukulungele ukuthi athathe ihlandla lesibili uma amalungu eqembu esamdinga.
UMncwango uthe ukulungele ukuthi kube khona abamphonsela inselelo. Uthe weneme ngempumelelo yeqembu ngaphansi kobuholi bakhe.
“Ngesikhathi ngingena esikhundleni izinto ebeziphezulu ezinhlelweni zami wukukhulisa iqembu emakhaya, ukuthola ivoti lamaseNdiya nokugcina ivoti labamhlophe. Konke ebengikufisa kwenzekile,” kusho uMncwango.
Uthe ngesikhathi engena esikhundleni bebenamakhansela awu-140 kodwa manje asewu195.
“EThekwini sithathe ama-ward awu-10 kwi-ANC okuyimpumelelo enkulu,” kusho uMncwango.
Uthe bakhethe ukuthi zonke izingqungquthela zezifundazwe zibe kulo nyaka ngoba befuna ukuthi u-2018 bawusebenzisele ukukhankasela u-2019.
“Bheka ingqungquthela yaseKZN, bekumele ibe ngonyaka ozayo kodwa sizoyenza kulo nyaka ngoba sifuna ukuthi ngonyaka ozayo sigxile ku-2019,” kusho uMncwango obenguSihlalo waseKZN ngemuva kokuqumba phansi uMchunu ngo-2015..
UNksz Ntuli osephumele obala ezinkundleni zokuxhumana wathi uzovotela uMncwango ekutheni athathe ihlandla lesibili.
“Yize ingakavulwa inkundla yokuthi kuphakanyiswe amagama kodwa alikho iphutha ngokuthi umuntu aveze ukuthi uzovotela bani,” kusho uNksz Ntuli.
UNksz Ntuli uthe yena akafihli ukuthi uzovotela uMncwango,