Ababili enkantolo kwelokubulala indoda
AVELE enkantolo izolo amadoda amabili asolwa ngokubulala indoda eneminyaka ewu-65 nokuzama ukubulala unkosikazi wayo.
Okhulumela amaphoyisa KwaZulu-Natal, ULt Colonel Thulani Zwane, uthe abashadile bahlaselwa ekupheleni kukaJulayi ngesikhathi bebuka ithelevishini emzini wabo.
Kuthiwa kwangena amadoda amathathu ngewindi agwaza umufi ngesikhathi ezama ukuvikela inkosikazi yakhe.
UZwane uthe indoda eyodwa eneminyaka ewu-18 iboshwe ngempelasonto eHibberdene kwathi eyesibili eneminyaka ewu-27 yazinikela esiteshini samaphoyisa ngoMsombuluko.
Uthe uphenyo lwamaphoyisa luholele ekutheni kutholwe ezinye izimpahla ezathathwa ngesikhathi kugcwelezwa.
Abasolwa babekwe amacala okubulala, ukuzama ukubulala nokushaya. Umsolwa wesithathu usagcwele amathafa.
Khonamanjalo izobuyela ngesonto elizayo enkantolo yemantshi KwaMaphumulo indoda esolwa ngokubulala nokutholwa nesibhamu esingekho emthethweni.
UMnuz Mkhanyiseni Dlamini (23) ubevele enkantolo yaKwaMaphumulo ngoLwesihlanu ngemuva kokubanjwa nesibhamu esingekho emthethweni ehostela KwaMashu.
UZwane uthe uDlamini ubefunwa uthuli ngamaphoyisa aseNsuze ngamacala ehlukene enzeke eMahlabathini naseBhamshela.
Uthe uDlamini uboshwe esenkantolo yemantshi eNtuzuma ngemuva kokuthi eboshelwe icala lokutholakala nesibhamu esingekho emthethweni ehostela KwaMashu.
UZwane uthe uDlamini usolwa ngecala lokubulawa kukaMnuz Nkosingiphile Gcina, isidumbu sakhe esatholwa sinamanxeba okudutshulwa eMahlabathini ngaseNsuze ngoFebhuwari.
Usolwa nangecala lokudubula indoda eneminyaka ewu-24 eyahlaselwe erenki yamatekisi ngenyanga edlule.
Umsolwa ungowesibili oboshelwe la macala kanti omunye asolwa naye uvele usezitokisini.
UDlamini kuthiwa uyaziwa eNsuze, eNgcongangconga naseBhamshela ngokuhlukumeza abantu ebasabisa ngesibhamu nokudubula emoyeni emzini yabantu.
Kuthiwa ubebuya aphuce ngenkani abantu izindlu zabo, abasabise ngokuthi uzobenza banyamalale uma beke babika.
Umkhuzi wamaphoyisa KwaZulu-Natal, uMajor General Bheki Langa, uncome abaphenyi ngokuhlala beqaphile nokuxhumana kahle kwabaphenyi esifundazweni ukuze bakwazi ukubamba uDlamini.
Isibhamu esitholwe kuDlamini sizothunyelwa kohlolwa ukuze kubhekwe ukuthi asithinteki yini kwamanye amacala.