AmaLoeries aletha izigidi emnothweni weTheku
UZOTHUTHUKISA amakhono abafundi umcimbi omkhulukazi oklomelisa abemboni yokukhangisa obizwa ngamaLoeris.
AmaLoeries aqale ngoMsombuluko eNkosi Albert Luthuli International Convention Centre (ICC), eThekwini kanti azophela ngoMsombuluko ozayo.
Isikhulu esiphezulu samaLoeries, uMnuz Andrew Human, sithe bazoqala ngokulekelela abafundi abenza ezokukhangisa ezikoleni ezahlukahlukene babheke nezikhangiso abazenzile. “AmaLoeries angenisa u-R170 million emnothweni weTheku ngoba ahanjelwa ngabantu bezokukhangisa abangaphezu kuka-3 000. Amahhotela nezindawo zobumnandi ziyagcwala uma kukhona thina ngoba siyayithanda injabulo.”
Sithe baqale ukubheka izikhangiso ezenziwa ngabafundi ngoMsombuluko kanti kusasa nangoLwesihlanu bazoklomelisa abafundi ngemisebenzi yabo emihle abayenzayo. “Sizophinde sihambele amalokishi aseThekwini ukuze sivumbulule amakhono abafundi abangenayo imali yokufunda ezikoleni. Bazohlolwa amakhono ngezindlela ezihlukene, uma bephasile sizobanikeza imifundaze ukuze bangene kulo mkhakha,” kusho uHuman.
Uthe ukukhishwa kwemifundaze ezothuthukisa amakhono abafundi bezikole zasemalokishini kuyingxenye yokuletha uguquko emkhakheni wokukhangisa obugcwele kakhulu abamhlophe phambilini. “Sifuna umkhakha wezokukhangisa ube nazo zonke izinhlanga zakuleli, kube khona nabesifazane ezikhundleni eziphezulu. Lokhu sikwenza ngokukhipha imifundaze nokuthuthukisa amakhono abafundi abasemakolishi okukhangisa,” kusho uHuman.
Uthe abantu abahambela amaLoeries basuka eGauteng, Cape Town, Middle East nakwamanye amazwe ase-Afrika.
Uveze ukuthi bangu500 abantu abahlomule ngamathuba omsebenzi njengoba kunamaLoeries.
Uthe bazoya KwaMashu bayofundisa abafundi abangu-30 bezikole ezihlukene ngezokukhangisa wagqugquzela abafundi ukuthi bafake izicelo zomfundaze wabo okhishwa minyaka yonke.
Imininingwane yalo mfundaze itholakala kwiwebsite yamaLoeries ethi www.loeries.com.