UCoetzee ucathanyelwa elaphesheya
IZINKUNZI zaseScotland iGlascow Celtic Zicathamela isitobha seBafana Bafana uRivaldo Coetzee ogijima kwi-Ajax Cape Town.
Lezi zindaba ziqinisekiswe yimenenja yakhe uMike Makaab weProSport International okuyinkampani ephethe izindaba zalo mdlali oke wanyamalala ekhempini ye-Urban Warriors ecikwa wukuthi iqembu alifuni ukulalela izicelo zamaqembu aphesheya nawaseNingizimu Afrika amfunayo.
Ngemuva kwamasonto ugcine ebuyele ejimini waphinde waxolisa ngesenzo zakhe. Kuleli ugaqelwe yiMamelodi Sundowns ne-Orlando Pirates. “Yebo kuyiqiniso ukuthi iCeltic ifuna uRivaldo. Ngesonto eledlule ithumele omunye wabaqeqeshi bayo ukuthi izombheka. Okwamanje angikwazi ukwanda kakhulu ngamazwi ngoba kusaxoxiswana,” kusho uMakaab. Inhloko ethimbeni labaqeqeshi kwi-Urban Warriors uMich d’Avry uziqinisekisile izindaba zokuthi iCeltic isike yabathinta ngalesi sitobha. “Yebo iCeltic isike yabuza ngesimo sikaRivaldo. Okwamanje asikho isicelo esiqinile esiphambi kwethu kodwa siyazi ukuthi bangathanda ukuthi ayodlala kubona. Nathi asizimisele ngokumvimba. Angingabazi ukuthi iqembu ngeke linqabe ukumdedela uma isicelo sikahle,” kusho u-D’Avry.
URivaldo (20) uphethe irekhodi lokuba ngumdlali omncane kunabo bonke asebeke bagqoka ijezi leBafana Bafana. Kwelesizwe usedlale imidlalo engaphezu kwengu-20. Ngo-2015 ubekhona iBafana idlala kwi-Africa Cup of Nations (Afcon) e-Equatorial Guinea.
Uphinde wayibamba nakumaOlympic Games eRio de Janiero, eBrazil. Amanye amaqembu aphesheya afuna lo mdlali yiBrondby IF yaseDenmark neKV Oostende yaseBelgium.
Namuhla kubhekwe ukuthi afakwe eqenjini likaBaxter elizodlala neCape Verde ekuhambeni nasekhaya emdlalweni wokuhlungela ukuzibekisela indawo kwiNdebe yoMhlaba eseRussia ngonyaka ozayo.