Bazoxoshwa abanqaba umuthi
IQEMBU lePremier Soccer League (PSL), iMbombela United, eligijima kwiNational First Division (NFD) lisabisa ngokuxosha abadlali balo abenqaba ukusebenzisa umuthi.
Lokhu kuvezwe ngumengameli weSouth African Football Players’ Union (Safpu), uTebogo Monyai izolo ekuseni.
“Njengamanje udaba esiphezu kwalo yilolu lwabadlali beMbombela United abasibikele ukuthi iqembu libesabisa ngokubakhomba indlela uma benqaba ukusebenzisa umuthi.
Emasontweni edlule iMbombela ibinekhempu eMozambique. Lapha kuthiwa bafike baya esangomeni. Isangoma kuthiwa besisika kancane abadlali izicubu ezithize zomzimba bese sithatha igazi labo silihlanganise.
“Nomqeqeshi u-Ashwin Sutton ugcine eshiyile ngenxa yale nto. Abadlali bayaphoqwa ukuthi bageze ngomuthi baphinde bawuphuze. Kuthiwa uma benqaba ukulandela imiyalelo izinkontileka zabo zizonqanyulwa. Yingakho-ke singenelela thina njengenhlangano emele amalungelo abadlali. Ezinkontilekeni zabo akukho lapho kubhalwe khona ukuthi bazosebenzisa umuthi,” kusho uMonyai. IMbombela isezinhlelweni zokubuya kabi ngesizini ezayo ukuze ishubise umbango weNFD. “Ngicabanga ukuthi noma yiliphi iqembu kubalulekile ukuthi ngaphambi kokuthi lisayinise abadlali lihlale nabo phansi libatshele ukuthi lisebenza kanjani. Ukusebenzisa umuthi akusilona ihlazo. Kuwumkhuba wethu njengabantu abamnyama kodwa akubona bonke abantu abawusebenzisayo. Abadlali abakhalayo abanankinga nomuthi. Inkinga wukuthi basikwe izicubu ezithize zomzimba, ukuthathwa kwegazi labo, ukuphuza umuthi nokugeza ngawo.
“Lokho kungadala izinkinga ezinkulu empilweni yabo. Abanankinga nokuthi ufakwe emajezini, yisebholeni nokuthi uchelwe enkundleni. Nathi ibhola silidlalile futhi amanye amaqembu abewusebenzisa umuthi kodwa asikaze siphoqwe ukuthi sigeze ngawo noma sisikwe izicubu ezithize zomzimba,” kusho uMonyai.
Umuthi yinto engeyintsha ebholeni. Ezinye izinkakha ezazidlala ibhola esigabeni esikhokhelayo sezike zaphumela obala ngokuthi beziwusebenzisa.
“IMbombela United siyibhalele incwadi siyazisa ukuthi sesiyazi ngalolu daba. Uma bengalulungisi sizozifikela thina eMbombela. Abadlali abakwazi ukuphathwa ngale ndlela,” kusho uMonyai.
Ethintwa usihlalo weMbombela United, u-Oupa Matsebula, ucingo lwakhe belukhala lungabanjwa. Imiyalezo athunyelelwe akazange ayiphendule.
Umdlali weMbombela akafunanga ukuphawula ezithethelela ngokuthi: “Angiyazi mina into enjalo kodwa sengike ngezwa kukhulunywa ngayo kwabezindaba.”