Kuthe cosololo efakwa kwelesizwe
UHLOSE ukuzinza eqenjini lesizwe le-netball uJessica Khomo obizelwe eqenjini lesizwe amaProteas ngemuva kokushaya into ecokeme kwiSpar National Netball Championship.
UJessica (26), odabuka eMgababa, ufakwe eqenjini lamaProteas elizoba nekhempu ngemuva kwemidlalo yochungechunge ne-Australia neNew Zealand.
Le ntokazi ephinde ibe nguthisha eDurlady of Sapinar, eDurban North, ibimele iqembu laKwaZulu-Natal, iSenior A Team kwiNational Netball Championship ebiseHoy Park, eThekwini, ngesonto eledlule.
Iqembu lakhe ligcine liphume endaweni yesihlanu kanti iGauteng iyona ekhale yemuka nesicoco.
“Ngijabule ngokubizelwa eqenjini lesizwe. Ngisebenze kanzima ukuze ngifinyelele lapho engikhona njengamanje. Ngiwamele cishe wonke amaqembu esizwe emazingeni aphansi. Ngidlale eqenjini lesizwe lika-Under 21 nelika-Under 19. Ngikholwa wukuthi ukubizelwa eqenjini lesizwe kuzongivulela eminye iminyango.
“Lapha ngizodlala noBongiwe Msomi odlala phesheya kwezilwandle. Nami uma ngenza kahle kwazi bani ukuthi ngingaphelela kuphi. Ngizimisele ngokufika kwelesizwe ngisebenze kanzima ukuze ngithole ithuba lokuzibonakalisa,” kusho uJessica.
Ngaphandle kokudlala i-netball ezingeni eliphezulu nokwenza umsebenzi wobuthishela, uJessica ubuye abe nomndeni.
“Nginengane yomfana ogama layo nguMpilo. Njalo uma ephuma esikoleni kumele ngimyise lapho enza khona ezemidlalo. Mina ngivuka njalo ekuseni ngo-3.50 ekuseni ngiye kojima, ntambama ngihambise umntanami ayokwenza ezemidlalo kwazise emini ngisuke ngisemsebenzini. Isikhathi yinto engingenayo. I-netball ikumina ngaphakathi. Ngiqale ukuyidlala ngisemncane,” kusho uJessica.
Ufunde eWarner Beach Senior Primary School waphothula amabanga aphezulu eManzimtoti High.
“Ngizimisele ukuqhubeka nokusebenza kanzima ukuze ngizuze ezinye izinto ngoba kuningi engisafuna ukukwenza kwi-netball. Ngiyazi ukuthi ngeke kube lula kodwa uma ngizinikela ngizokwazi ukuthola imiphumela emihle,” kusho uJessica.
Le ntokazi idlala i-goal defence eyaziwa ngeGD.
Selilonke iqembu limi kanje: Deancke Rohde (Gauteng), Maryka Holtzhausen (Free State), Renske Stoltz (Gauteng), Charmaine Baard (Western Cape), Romé Dreyer (North West), Lauren-Lee Christians (Eastern Cape), Phumza Maweni (Western Cape), Fikile Mkhuzangwe (North West), Jessica Khomo (KwaZulu-Natal), ZanneMarie Pienaar (Gauteng)
Ama-Reserve: Talja Venter (Western Cape), Tshina Mdau (Gauteng) and Shadine van der Merwe (Gauteng)