‘Kunzima ukuqala ngaphande komqeqeshi’
INSIKA yeLamontville Golden Arrows, uMusa Bilankulu, ivuma ubunzima bokuqala isizini ye-Absa Premiership ngaphandle komqeqeshi nephini lakhe abazoqala izigwebo zemidlalo emibili emunye.
I-Arrows ihlulwe yiBidvest Wits emdlalweni weMTN 8 obuhambisana nezidubedube eBidvest Stadium, eGauteng, ngoLwesihlanu ebusuku. Ibikade isihamba phambili ngo 2-0 kodwa yagcina ihlulwe kumaphenathi ngo 4-3 ngenxa yamaphutha abadlali basemuva.
Umqeqeshi we-Arrows, uClinton Larsen, nephini lakhe, uMandla Ncikazi, bakhishelwe ngaphandle noweWits, uGavin Hunt. Kuvele ukuthi izinhlangothi zombili kade zichaphana ngenhlamba. Ngaphezu kwalokho abadlali abathathu baphume ngamakhadi abomvu.
Kwi-Arrows kukhonjwe ngaphandle uDanny Phiri noSiyabonga Dube ongqubuze ngesiphongo uGabadihno Mhango. Kwi-Wits kuphume umdlali wasemuva omusha uSlavko Damjanovic obeqala ukudlala eqenjini.
Abafana Bes’thende bazovakashela i-Ajax Cape Town emdlalweni wokuqala wesizini ka-2017/2018 eCape Town Stadium, eKapa, ngoMgqibelo ngo-8.15 ebusuku.
Ebhetshini le-Arrows kungenzeka kubambe uVusumuzi “Kanu” Vilakazi ongumqeqeshi weqembu leMultichoice Diski Challenge nomqeqeshi wonozinti uMilton Nienov okunguyena owayesenika abadlali imiyalelo ngemuva kokuphuma kukaLarsen noNcikazi.
“Kuzoba nzima futhi kuzobonakala ukuthi abekho kodwa singabadlli siyakwazi okufanele sikwenze enkundleni. Sidinga ukuzilungiselela kahle njengoba besivele senza emidlalweni edlule. Uma singena enkundleni umdlali ngamunye uyakwazi okufanele akwenze. Kufanele sidlale ngendlela esihlele ngayo ngoba ngiyakholwa wukuthi singawuwina umdlalo,” kusho uBilankulu.
I-Arrows izophinde ibhekane neBloemfontein Celtic ngo-Agasti 23 ePrincess Magogo Stadium ngaphandle kwabaqeqeshi. Bayoze bahlale ebhentshini i-Arrows isivakashele iWits khona eBidvest Stadium ngoSepthemba 13.
UHunt uzobuya emdlalweni womlenze wokuqala owandulela owamanqamu weMTN8 neCape Town City ngempelasonta ka-Agasti 26 no-27. Uzohlala owokuvula weligi ne-The Citizens kusasa ebusuku noweFree State Stars ngoLwesithathu oluzayo eGoble Park.
“Kuhlale kubalulekile ukuqala kahle kuyona yonke imiqhudelwano ngoba uzinika ithuba. Ngesizini edlule asiqalanga kahle kwazise sahlulwa emdlalweni wokuqala sibhekene nePirates kodwa sabuye sabuya. Kuhle uma ubona ukuthi awukho ezingeni ngoba uma uwina umdlalo wokuqala uzozitshela ukuthi usulungile bese uzithela ngabandayo. Le midlalo kukhona esifundisa khona yikho sibe yiqembu elingcono ngesizini edlule,” kusho uBilankulu.
“I-Ajax angazi lutho ngayo kodwa siyawahlonipha wonke amaqembu. Kodwa ngiyakwazi okungenziwa yi-Arrows futhi yilokho esizokwenza ukuthola amaphuzu amathathu.”