Ubhekiwe ozokhipha inkunzi ematholeni
SEBEYIBHEKE ngabomvu indumezulu yomcimbi wokumenyezelwa kweNgqwele Kamaskandi Festival eWorkshop Centrum Park, eThekwini ngoSepthemba 2.
Lokhu kuvele ngesikhathi ithimba labagqugquzeli beNgqwele lihlangene nabalandeli bezihlabani ezizobe zisina zidedelana ngalolu suku emhlanganweni obusemahhovisi eSolezwe izolo. Ezinduneni ebezikhona kubalwa uNcwadi Mthembu waMageza Amahle, uSlindile ‘Gcino’ Zulu weMfezemnyama, uLungile Hlongwane kaQhoshangokwenzakwakhe, uZinhle ‘Mkabayi’ Hadebe woSaziwayo, uSizwe Mkhize noSifiso Ndimande bakaBahubhe.
Lezi zinduna zithembisile ukuthi zizobagqugquzela abalandeli bamaqhawe azo ukuba bafike ngobuningi babo futhi zakhuthaza ukuba kusheshe kuthengwe amathikithi lungakashayi usuku lomcimbi ukuze kugwenywe ukuphoxeka ngomzuzu wokugcina.
UMhleli weSolezwe uSlindile Khanyile ubonge abalandeli ngokuxhasa umncintiswano, waxolisa ngobuhixihixi futhi wazibophezela ukuthi abalandeli nabaculi bayoba nezwi ngaphambi kokuqala komncintiswano ka-2018.
Ube esenxusa izinduna ukuba zibambisane nabahleli balo mcimbi ukugqugquzela umoya wokuthula ngosuku lwawo ukuze abantu babuyele emakhaya bephelele futhi besathokozile. UMhleli ubuye wachaza kabanzi ukuthi yini ebibambezele ukumenyezelwa komculi owinile nokuthi kungani amathikithi ebiza uR80.
Abaculi abazobe benandisa nguMjikjelwa, Igcokama Elisha, Khuzani, Qhosha, Indodakazi Yentandane, Bahubhe, Amageza Amahle, Osaziwayo, Mroza neMfezemnyama. Uhlelo luzobe luphethwe ngumsakazi woKhozi FM uZimiphi ‘Zimdollar’ Biyela nomsakazi weZwi Lomzansi 98.0 FM u-Andile ‘MC Pholobas’ Ngcobo.
Khona manjalo, intaka izobe ibekelwe amazolo emcimbini wokukhuthaza ukuthengwa kwamathikithi eNgqwele. Lo mcimbi uzobe usezitolo zakwaShange KwaMashu ngoMgqibelo phakathi kuka-10 ekuseni no-2 emini.
Kungenwa mahhala futhi kuzobe kuwiniswa amathikithi nempuphu yakwaPapa Maize Meal. Kuwona kuzobe kunandisa uGadla Nxumalo, Malahle, Igcokama Lethu, Amahlolamvula, Ubuhle Bezintandane, Mahluthula, Abasentembeni, Abancengi Bempilo, Izintombi Zomndeni, Ojelous Down neZingane Zamakhuba. Uhlelo luzobe luphethwe ngumsakazi weZwi Lomzansi 98.0 FM u-MC Pholobas.
Abaxhasi balo mqhudelwano yiSolezwe, Independent Media, Shoprite, Imbawula Investment, Papa Maize Meal, Umgeni Water, Maz Herbal Product, Zululand FM, Umnyango WezokuThutha KwaZulu-Natal, uMasipala weTheku, Coca Cola, Toyota Halfway Malanda, Cyassound, Ubunye Bamahostela