ITjovitjo izoba nabalingisi abazobe beqala ukubonakala
UGABE ngabalingisi abasha umdlalo ozoqala ngeSonto kwiSABC 1, obusulindelwe ngabomvu ngabantu bakuleli, iTjovitjo.
Kusuka ngoJuni, iSABC 1 ibulokhu ikhombisa izikhangiso zomdlalo omusha kodwa kungacaci ukuthi uqala nini.
Ngisho ezinkundleni zokuxhumana abantu bese bekhononda ngalesi sikhangiso bethi sesiyabadina.
ITjovitjo wumdlalo okhuluma ngamaqembu ahlukene omdanso abizwa ngamaTjovitjo, adansa isipansula.
Abalingisi bawo bethulelwe abezindaba eNewtown, eGoli, ngesikhathi iSABC 1 ithula izinhlelo ezintsha ezizoqala kule nyanga ezinye ngenyanga ezayo.
Lo mdlalo uqondiswe nguVincent Moloi wabhalwa nguLondi Matsetela.
Umphathi weSABC 1, uClara Nzima, uthe isiteshi sabo sesiyaziwa ngokukhombisa izinhlelo ezivutshelwe kuleli nokuyinto ebathokozisayo.
“Umdlalo ukhuluma ngobunzima obubhekana nentsha ezama ukuziphilisa ngomdanso. Izinto aziyihambeli kahle kodwa iyaqhubeka nokubheka phambili kulokhu ekufunayo. Iyaxabana, izondane, ibuye ithandane enye yayisifuna ukuyeka ukudansa kodwa ngoba inephupho iyaqhubeka ngoba inothando futhi ibheke empumelelweni.”
Uthe babone kungcono basebenze nentsha engakaze ilingise ukuze izimisele.
“Bakhona abalingisi abadumile kodwa iningi labo bazobe beqala ukubonakala kuthelevishini. Besifuna abantu esizobenza osaziwayo kulo mdlalo.”
Kubalingisi abazobonakala kukhona uWarren Masemola(Ma’Fred), Rapulana Seiphemo(Bro’Terror), Lali Dangazela(Mandisa), Soso Rungqu (Kopano), Jabulile Mahlangu(Thandeka), Fisiwe Kubeka(Mbali) nabanye.