I-SABC yethule izinhlelo ezintsha zangeSonto
KUCACE bha ukuthi isiteshi sakwaSABC 1, sifuna ukubhincisela nxanye ezinye iziteshi ngosuku lwangeSonto.
Lokhu kugqame ezinhlelweni ezintsha abazethule eGoli izolo.
Kusukela ngeSonto esiya kulo ngo-7.30 kuzokhonjiswa imidlalo eyahlukene.
Umdlalo i-Intersexions, ukhuza ibuya kulesi siteshi ngo-8, ebusuku.
Uzolandelwa yiTjovitjo bese kuthi ngo-8.30 kukhombiswe umdlalo othi Shaka Zulu, okhuluma ngempilo yeSilo uShaka.
UClara Nzima uthe, ukubuya komdlalo i-Intersexions kuzoqinisa izinhlelo ezikhonjiswa ngesikhathi la wonke umuntu esethe njo kwithelevishini yakhe.
“Besidinga ukuba nemidlalo efana nalena ngeSonto futhi siyifake ngesikhathi umndeni usuphelele, ujabulela izinhlelo ezahlukene kuthelevishini. Siyathemba lezi zinhlelo zizobajabulisa abantu bakuleli,” kuchaza yena.
Uthe ziningi izinhlelo ezizayo ezinyangeni ezilandelayo abantu abazozithokozela.
Kulo mcimbi kuphinde kwethulwa imidlalo emibili yamahlaya othi uThuli noThulani okulingisa kuwo abalingisi okukhona kubo uWrite Ngubeni, Tango Ncetezo noSlindokuhle Pride Tshabalala.
Omunye umdlalo othi Rented Family, kulingisa kuwo uTrevor Gumbi, Linda Sebenzo noGabriel Mini.
Emdlalweni i-Intersexions kuzobonakala abalingisi okukhona kubo uSdumo Mtshali, Noxee Maqhashalala, Mbali Ntuli, Mothusi Mogano nabanye.
Abalingisi bakuleli asebadlula emhlabeni bazobonakala emdlalweni uShaka Zulu, okukhona kubo uHenry Cele, Roland Mqwebu noSimon Sabela.
Njengoba kuqhubeka inyanga yabesifazane nje, lesi siteshi sizokhombisa ngezinhlelo ezahlukene ezikhombisa abesifazane belwela inkululeko.
Izinhlelo ezifana noluthi Idwe, On The Shoulders noluthi Prize ziyaqhubeka nokubonakala kwiSABC1.