Kukhulelwe nabakuGrade 3 eKZN
ZIYASHAQISA izibalo zabafundi abakhulelwe ezikoleni zaKwaZulu-Natal ngonyaka odlule njengoba bengu-803 kanti kulaba abangu-19 bengabafundi bakuGrade 3.
Lezi zibalo zikhishwe nguMnyango weMfundo eyisiSekelo uphendula umbuzo kaNksz Sonja Boshoff we-DA ePhalamende.
UNksz Boshoff ubuze ukuthi ezibalweni umnyango owazikhipha ekuqaleni konyaka zazingekho ezalesi sifundazwe. Ubuze nokuth iphothulwa nini imigomo ethinta ukunqanda ukukhulelwa kwabafundi nokuthi kwenziwa njani ngalabo asebekhulelwe.
UNkk Motshekga ube esekhipha izibalo wathi iningi labakhulelwa babenza u-matric.
“Abangu-201 kubafundi abangu-803 abakhulelwa ababenza u-matric. KwaGrade 11 babengu-178 abakhulelwa KwaZulu-Natal ngo-2016. KwaGrade 4 bangu-17, kwaGrade 5 bangu-22, kwaGrade 6 bangu-19, kwaGrade 8 bangu29, kwaGrade 9 bangu-63 kanti kaGrade 10 bangu-158.
“Imigomo ethinta ukukhulelwa kwabafundi isasesigabeni esiphansi. Isezinhlakeni ezithintekayo zezemfundo, izobe isidlulela kwiKhabhinethi ukuze liyigunyaze bese iba semthethweni,” kusho uNkk Motshekga empendulweni.
Okhulumela uNgqongqoshe wezeMfundo esifundazweni uMnuz Mthandeni Dlungwana, uMnuz Kwazi Mthethwa, uthe udaba lokukhulelwa kwabafundi ngeke balulwe bodwa ludinga zonke izinhlaka okubalwa nabazali. Uthe izinhlelo ezifana ne-My Life My Future ngezinye zezinhlelo abanazo zokunqanda lesi sihlava. “Ziyashaqisa izibalo kodwa kudingeka sibhukule sonke silwe nalesi sihlava. Kubafundi abenza uGrade 3 abakhulelwayo, kungenzeka ukuthi iningi labo abasemakhaya okungenzeka ukuthi kwaba namaphutha bebhaliselwa izitifiketi kwathiwa bancane kanti sebekhuile ngoba izingane zakwaGrade 3 zincane,” kusho uMthethwa.
Uthe kunama-blesser nawo anesandla ekukhulelweni kwezingane zesikole. “Umnyango wezempilo esifundazweni waqhamuka nomkhankaso owasekwa ngisho ikhabhinethi wokulwa nama-blesser akhulelisa izingane ezincane. Kumele umphakathi ulwe nama-blesser ngoba acekela ikusasa lezingane.”
UNksz Troy Martens, okhulumela uNkk Motshekga, uthe le migomo ethinta ukukhulelwa kwabafundi, ifaka izinto okumele zenziwe uma umfundi ekhulelwa.
Uthe kunezifundo ezifana ne-Life Orientation efundisa kabanzi ngempilo jikelele.
Okunye okuqukethwe ile migomo ngukuthi abafundi abakhulelwe akumele baxoshwe kodwa kumele bafunde baze babelethe.
“Uma umfundi enezinyanga eziyisithupha ekhulelwe kudingeka alethe incwadi kadokotela esho usuku angase abalethe ngalo. Umfundi kumele aphinde akhiphe enye incwadi eshoyo ukuthi angaqhubeka afunde uma esenamasonto angu-30 (izinyanga eziyisishagalombili), uma ehluleka ukuletha le ncwadi kumele ahlabe ikhefu,” kubalula le migomo.
UNkk Motshekga usanda kuphasisa imigomo egunyaza ukusatshalaliswa kwamakhondomu ezikoleni ukuze kunqandwe ukukhulelwa kwabafundi nokusuleleka ngengculazi.