Izinyathelo kothisha abasaqhubeka nokucwasa abafundi ngokwebala
BAZOTHATHELWA izinyathelo othisha nothishanhloko abacwasa abafundi ngokwebala.
Lokhu kushiwo nguMnuz Kwazi Mthethwa, okhulumela uNgqongqoshe wezeMfundo esifundazweni uMnuz Mthandeni Dlungwana, izolo kulandela ukuphazamiseka kokufunda eGeorge Campbell Technical High, eThekwini abafundi bebhikisha bekhala ngokucwaswa othisha abamhlophe.
Abafundi bakhala ngokuthi babizwa ngezinkawu namakhafula ngothisha abamhlophe kungenzeki lutho.
Ohlwini lwezikhalo bathi sebebhikishe kane bekhala ngokucwaswa.
UMthethwa uthe bayaziqhelisa nezikole ezicwasa abafundi abamnyama.
“Sesiyaqaphela ukuthi kukhona abaqhubekayo nokuyishaya indiva imizamo yokulwa nobandlululo nokucwasa ngokobuhlanga. Sizothathela noma ngubani othintekayo izinyathelo uma kutholakala ukuthi ucwase umfundi,” kusho uMthethwa.
Unxuse abafundi bakulesi sikole wathi mabehlise umoya ngoba udaba luyalungiswa yihhovisi lesifunda.
Izolo ezinkundleni zokuxhumana bekusabalele amavidiyo abafundi bakulesi sikole bephethe izingqwembe bekhala ngokucwaswa.
Abafundi bavale isango lokungena ngamabhentshi kwabizwa amaphoyisa omkhandlu nawe-SAPS.
Omunye umfundi uthe kade babekhala kodwa akwenzeki lutho.
“Sihlale sikhala ngokucwaswa kodwa kungenzeki lutho. Kunothisha abasibiza ngamakhafula nangezinkawu bathi bona bangamaBhunu asisoze salingana nabo,” kusho umfundi.
Uthe isiBhunu siyakhulunywa kodwa uma bezama ukukhuluma isiZulu bayanqatshelwa.
“Sifuna othisha abasibiza ngezinkawu baxoshwe. Asikwazi ukufundiswa abantu abasibiza ngale ndlela esikhathini sentando yabantu,” kusho umfundi.