Kubhekwe uZuma ngekusasa likaManana
IKHABHINETHI ayikasithathi isinqumo sokuthi ngabe kumele iPhini likaNgqongqoshe wezeMfundo uMnuz Mduduzi Manana, asule esikhundleni sakhe noma ahlale yini njengoba ebhekene necala lokushaya owesifazane endaweni yokucima ukoma, eseSandton ngesonto elidlule.
Ikhabhinethi alizange liyixoxe nendaba kankosikazi kaMengameli waseZimbabwe uMnuz Robert Mugabe, uNkk Grace Mugabe osolwa ngokushaya intokazi yakuleli ngempelasonto. Kuthiwa uNkk Mugabe usebenzisa umthetho ovikela omengameli bamazwe ukuthi bashushiswe.
Izolo uNgqongqoshe wezokuXhumana uNksz Ayanda Dlodlo, uthe umhlangano wekhabhinethi uzidingidile izindaba zokuhlukunyezwa kwabesifazane kodwa awuzange uluthinte olukaManana.
UNksz Dlodlo uthe uManana waqokwa nguMengameli Jacob Zuma ngakho ikhabhinethi ngeke iluxoxe udaba lwakhe.
“Asizange sixoxe ngabantu okufanele baphume ezikhundleni noma okufanele baxoshwe, lokho kuzoxoxwa nguMengameli. Izindaba enifuna sizithinte zisezithebeni zenkantolo,” kusho uNksz Dlodlo.
UManana udedelwe ngebheyili ka-R5 000 emuva kokuvela kafushane enkantolo yemantshi yaseRandburg ngoLwesihlanu oludlule.
Iningi longqongqoshe be-ANC lithe uManana kufanele axoshwe noma asule esikhundleni sakhe.
UNksz Dlodlo uthe nguManana ozozikhethela ukuthi uyasula noma uyaqhubeka nokuhlala esikhundleni sakhe.
Mayelana noNkk Mugabe uthe: “Asifuni ukudingida izindaba zamaphoyisa noMnyango wezangaPhandle,” kusho uNksz Dlodlo.
Amaqembu aphikisayo athe kufanele aboshwe uNkk Mugabe njengoba ehambele iSouthern African Development Community Summit eqala namhlanje ePitoli nomyeni wakhe.