Usesusiwe esikhundleni sakhe
USOTSWEBHU we-ANC ePhalamende, uMnuz Jackson Mthembu, usemsusile uDkt Makhosi Khoza esikhundleni sakhe sokuba nguSihlalo weKomiti labasebenzi bakahulumeni nezokuphatha.
UMthembu uthe ulandela umyalelo awunikwe yi-ANC kuzwelonke wokuthi makasuswe uDkt Khoza.
Ubalule ukuthi uDkt Khoza uxoshelwe ukungalaleli nokutshela abantu ukuthi uvotele ukungabethembi ubuholi bukaMengameli Jacob Zuma kuvotwa ngokuyimfihlo lwangoLwesibili oludlule.
Uthe izinkulumo zikaDkt Khoza ziholele ekutheni amanye amalungu e-ANC angalihambeli ikomiti lakhe ngenxa yokuthi amthatha njengehlongandlebe elingathembekile.
“Isinqumo sokumsusa esikhundleni sakhe silandela izikhawu eziningi lapho i-ANC izamile ukukhuluma naye imncenga ithi makaziphathe kahle kodwa engalaleli. Sesimtshelile ukuthi siyamsusa esikhundleni ngokuphazima kweso kodwa uzoqhubeka nokuba yilungu lePhalamende kuze kuphume isinqumo sokuqondiswa kwakhe ubugwegwe,” kusho uMthembu. Uthe bazoqoka abantu abasha abazongena kuleli komiti ukuze umsebenzi walo uqhubeke nokubhekelela izidingo zabantu bakuleli. UMthembu uthe bazoqhubeka nokuwaqondisa ubugwegwe amalungu abo angawuhambelanga umhlangano wekomiti likaDkt Khoza. Ekhuluma ngaphambi kwenkundla yokucobelelana ngolwazi ebiseWits izolo uDkt Khoza uthe uzamukele kahle izindaba zokumiswa kwakhe esho nokuthi useyilungu elithembekile emzabalazweni we-ANC. “Ngiyilungu elithembekile le-ANC ngilandela okumelwe yiyo. Angithembekile kwinkohlakalo nakubantu abakuhulumeni ngoba befuna ukuzenzela inzuzo. Ngizoqhubeka nokulwela abantu bakuleli ngiqede inkohlakalo. Ngangena kwi-ANC ngineminyaka engu-12 angiqali ukubhekana nesimo esinjena,” kusho uDkt Khoza.
Etshelwa ukuthi abafundi baseWits bakholwa wukuthi uyisibonelo esihle, uthe uyabathanda futhi ufuna babe nesibindi sokulwa nenkohlakalo nabaholi abakhohliwe ukuthi bamele abantu.
“Sikhathele yizinhlangano zomzabalazo ezizenzela umathanda e-Afrika. Sifuna intuthuko, asiyifuni inkohlakalo,” kusho uDkt Khoza.
Uthe njengoba engaseyena uSihlalo wekomiti uzohlala emabhentshini asemuva ePhalamende lapho aqala khona kwazise akayanga ePhalamende ngoba efuna ukuzuza okuthile kodwa waya khona ngoba efuna ukuletha umehluko empilweni yabakuleli.
Amaqembu aphikisayo akugxekile ukuxoshwa kukaDkt Khoza.
Umholi we-EFF uMnuz Julius Malema uthe leli gwala elinguGwede selikhiphe uDkt Khoza esikhundleni sakhe.
UMnuz John Steenhuisen weDA uthe ukuxoshwa kukaDkt Khoza kukhombisa ngokusobala ukuthi i-ANC ayibafuni abaholi abasebenzela umphakathi, incamela ukubaxosha kodwa igcine abangenandaba nomphakathi abale kubona uNksz Bathabile Dlamini, Nksz Faith Muthambi nabanye.
Umhlaziyi wezepolitiki ozimele uMnuz Thabani Khumalo uthe uyathuka ngokuxoshwa kukaDkt Khoza njengoSihlalo wekomiti ngoba ubengakulindele lokhu.
“Besilindele ukuthi zikhona izinyathelo azothathelwa zona kodwa besithi kuzoqala ngokuthi kuphothulwe uhlelo lokuqondisa ubugwegwe ngaphambi kokuthi athathelwe izinyathelo. Angiboni ukuthi isimo sihleleke ngendlela enobunono ngoba lokhu kwakha isithombe esibi sokuthi i-ANC ayikwazi ukubekezelela abanemibono engahambisani neyayo,” kusho uKhumalo.
Uthe balindele ukuthi uDkt Khoza axoshwe njengelungu lePhalamende ngoba akamboni enqoba icala lokuqondiswa ubugwegwe alibekwe yi-ANC KwaZulu-Natal futhi ubona sengathi uzoxoshwa njengoba kwenzeka kuMalema.