Ukhale ngobunzima bokhetho luka-2019 ethula incwadi
UDKT Nkosazana Dlamini Zuma ongomunye wabazongenela ukhetho lokwengamela i-ANC ngoDisemba, uthi ukhetho lwango-2019 luzoba nzima njengoba amaqembu aphikisayo eseyiqalile imizamo yokususa i-ANC embusweni.
UDkt Dlamini Zuma ufuna ukungena esikhundleni sikaMengameli Jacob Zuma uma ephuma bese ephatha izwe ngo-2019.
Uthe yize ukhetho luzoba nzima kodwa izikhungo ezibhekelele ukhetho zizoqinisekisa ukuthi luhamba kahle kube nokuthula futhi kungabikhona ukwenzelela.
UDkt Dlamini Zuma ukhulume kanje izolo ngesikhathi ethula incwadi ekhuluma ngempilo yakhe esaphethe i-African Union Commission, e-Addis Ababa, e-Ethiopia.
“Abantu bafuna ukukhetha uhulumeni ozokwazi ukuxazulula izinkinga ababhekene nazo. Uhulumeni ozoqinisekisa ukuthi izingane ziyafunda futhi ozoqhubeka nomsebenzi omuhle esiwuqalile,” kusho uDkt Dlamini Zuma.
Uxwayise uhulumeni ukuthi kufanele ufeze izithembiso owawuzenzile kubantu.
Incwadi kaDkt Dlamini Zuma ibheka umsebenzi wakhe kusuka ngoOkthoba 2012 kuze kube nguMashi 2017 ngesikhathi ebhekelele izindaba ezihlukene zase-Afrika.
Inezithombe zikaDkt Dlamini Zuma nabaholi bamazwe ahlukene kusuka kuShansela waseGermany uNkk Angela Merkel, uMengameli waseChina uMnuz Xi Jinping, owaseZimbabwe uMnuz Robert Mugabe, uPhapha wamaRoma uFrancis, owayenguMengameli waseMelika uMnuz Barack Obama, owayenguMengumeli waseFrance uMnuz Francois Hollande, owaseSouth Korea uMnuz Park Guen-hye, nowayenguMengameli waseNigeria uMnuz Olusegun Obasanjo.
Ubuholi bukaDkt Dlamini Zuma buthathwa njengobuqhakambise uhlelo luka-2063 oluxazulula izinkinga zemiphakathi yaseAfrika.
Lolu hlelo lweminyaka engu-50 lufuna ohulumeni base-Afrika bashintshe impilo yabantu base-Afrika ngokuthuthukisa ingqalasizinda, beze nezinhlelo zokuthuthukisa intsha nengqalasizinda. Kufanele izinhlelo ezenziwayo zibe nemiphumela eminyakeni emihlanu bese kudlulelwa kwezinye. USihlalo we-Independent Media eshicilela Isolezwe u-Dkt Iqbal Survé, uchaze uDkt Dlamini Zuma njengomholi othuthukisa i-Afrika futhi onikele ngakho konke ukuletha inkululeko eNingizimu Afrika. Ubalule ukuthi uyisishoshovu somzabalo futhi ubengungqongqoshe wezempilo, ezasekhaya nezangaphandle. “Asibachomi uphaphe lwegwalagwala ngokwanele abesifazane ababeyibambe ishisa ngesikhathi somzabalozo. Kuyasijabulisa ukuthi sibe yingxenye yokwethulwa kwale ncwadi futhi kusinika ithuba lokukhuluma ngabesifazane abenza izinto zenzeke e-Afrika,” kusho uSurvé.
Ugxeke umphakathi ngokungahloniphi abesifazane nemisebenzi emihle abayenzayo. Uthe uDkt Dlamini Zuma waba nesibindi sokuvimba abantu ukuthi babheme esidlangaleni ngaleyo ndlela wasindisa impilo yezigidi zabantu bakuleli. “Ngesikhathi engungqongqoshe wezangaphandle uDkt Dlamini Zuma wenze umsebenzi oncomekayo wokukhangisa izwe lethu. Besidume kahle,” kusho uSurvé.
UDkt Dlamini Zuma kwisandulelo sencwadi yakhe ubhale ukuthi ngesikhathi ephethe i-AU Commission wayebeka abantu base-Afrika phambili efuna babe nekusasa eliqhakazile. “Ngifisa umphathi we-AU Commission athuthukise abantu base-Afrika. Mina ngiyohlale ngiqinisekisa ukuthi abantu baleli zwekazi banempilo engcono noma ngabe ngikuphi,” kuphetha uDkt Dlamini Zuma.