Isexwayiso sezanusi zezulu ngesimo sezulu
IZANUSI zezulu zixwayise abantu zathi mabahlale beqaphile njengoba likhithika ezindaweni ezakhele izintaba zoKhahlamba.
Bathe amakhaza ashubisa umnkantsha aqale ngoLwesithathu ntambama azoqhubeka kuze kube kusasa.
UNksz Thandiwe Gumede oyisazi sezulu kwaSouth African Weather Service uthe umsinga obandayo uqale ngoLwesithathu ebusuku kanti uletha imvula ehambisana nomoya onamandla.
Uthe likhithikile ezintabeni zoKhahlamba, eMatatiele naseMpendle.
“Sithi abantu abaqaphele ngoba imvula izodala izikhukhula ezindaweni ezehlukahlukene KwaZulu-Natal. Abashayeli mababheke ukuthi imigwaqo abayisebenzisayo ayijwayele yini ukuba nezikhukhula ukuze basebenzise eminye,” kusho uNksz Gumede.
Uthe umoya uzohamba ngesivinini sika-65km ngehora kube namagagasi anolaka olwandle.
Amazinga okushisa e-Underberg azosuka ku-3 degrees kuya ku-9 degrees kuthi eThekwini asuke ku-11 degrees kuya ku-16 degrees.
Amathuba emvula azoba ngu60% kanti amagagasi olwandle azoqhubeka nokuba nolaka.
Khonamanjalo uMasipala weTheku uwavalile amabhishi ngenxa yamagagasi anolaka. Ababhekele ezokuxhumana bathe bazowazisa umphakathi uma amabhishi esekulungele ukusetshenziswa ngumphakathi.
UNgqongqoshe wezokuBusa ngokuBambisana nezoMdabu uNkk Nomusa Dube-Ncube uthe amathimba abo ezinhlekelele ami ngomumo ukusiza abazokhahlanyezwa yisimo sezulu esibi.