Kuzocwaningwa ngokudlanga kwesifo sofuba
KULINDELEKE ukuthi luqale kule nyanga, eThekwini ucwaningo oluzobheka ukudlanga kwesifo sofuba eNingizimu Afrika.
Ngokusho kukaMnuz Popo Maja okhulumela uMnyango wezeMpilo kuzwelonke, lolu cwaningo olwaziwa nge-TB Prevelance Survey olwenziwa yizinhlangano zocwaningo, iNational Insitute for Communicable Diseases (NICD), iHuman Sciences Research Council (HSRC) neSA Medical Research Council (MRC) luzobheka ukuthi ludlange kangakanani ufuba kuleli.
Uthe kulindeleke ukuthi abacwaningi bathathe iminyaka emibili bezama ukuthola iminingwane ethinta ufuba kubantu abalinganiselwa ku-55 000 abavela ezifundazweni ezahlukene.
Lolu cwaningo lucishe lufane nalolu olubheka ukudlanga kwegciwane lengculazi ezweni lonke, iHIV. Luzosiza ukucacisa ukuthi bangaki abantu abahlaselwe wufuba kuleli nokuthi yini okusafanele yenziwe ukulwa nokusabalala kwalesi sifo.
Ngokwezibalo zenhlangano yezempilo emhlabeni wonke iWorld Health Organisation (WHO) iNingizimu Afrika ibalwa emazweni angu-22 anezibalo eziphezulu zabantu abahlaselwe wufuba.
Ngokwezibalo zango-2013 babelinganiselwa ku-450 000 abantu ababenofuba eNingizimu Afrika. Iningi lalabo abanofuba liphinde libe negciwane lengculazi.
Ngokwezibalo zale nhlangano u-80% wabantu abanofuba uqhamuka kuleli.
Abasebenzi abavela kuzinhlangano ezenza ucwaningo bazothunyelwa ezindaweni ezahlukene lapho bezovakashela khona imizi ukuze bathole imininginwane ngofuba kuleyo miphakathi.
Uthe kuzokwenziwa imikhankaso eyahlukene ngenhloso yokunxenxa umphakathi ukuthi ube yingxenye yocwaningo.
“UMnyango wezeMpilo sewukwazile ukwenza umehluko ekulashweni kofuba ngokwandisa izindawo nemikhankaso yokuhlola osekuholele ekutheni kuhlolwe abantu abangaphezu kuka-500 000. Ngaphandle kwalokhu sekwandiswe nezinhlelo zokuhlola ngokuthi kwandiswe imishini yokuhlola amaGeneXpert,” kusho uMaja.