Bazodingida olomdlavuza eKZN
KULINDELEKE ukuthi ludingidwe nguNgqongqoshe wezeMpilo kuzwelonke, uDkt Aaron Motsoaledi neziphathimandla zesifundazwe saKwaZulu-Natal udaba lokuphazamiseka kokulashwa komdlavuza kulesi sifundazwe.
Izolo, uNdunankulu wakulesi sifundazwe uMnuz Willies Mchunu utshele amalungu esishayamthetho eMgungundlovu ukuthi uzohlangana noMotsoaledi neziphathimandla zomnyango wezempilo ukudingida izinkinga zalo mnyango.
Eqhulwini lwezingxoxo ezizobe zidingidwa, kuzobe kuyinkinga yokulashwa komdlavuza okukholakala ukuthi seyiholelele ekutheni kufe inqwaba yeziguli zilinde ukulashwa. “Mayelana nezindaba ezithinta ukulashwa komdlavuza, ngifisa ukubika ukuthi mina noNgqongqoshe wezeMpilo kuzwelonke, uDkt Motsoaledi sizoba nomhlangano neziphathimandla ezifanele kusasa (esho namuhla),” kuho uMchunu.
Uthe kulo mhlangano bazobheka imibiko ngophenyo oselwenziwe ngodaba lokulashwa komdlavuza kanye neziphakamiso ezenziwe. Bazophinde babheke ezinye izindaba ezibalulekile ezithinta ukuqashwa nokugcinwa kodokotela esifundazweni, kulaba kubalwa nodokotela abayisipesheli. Uthe bafuna ukuqinisekisa ukuthi iziguli zakulesi sifundazwe zithola usizo lwezempilo olusezingeni elifanele.
UMchunu uqhube wathi imiphumela yalo mhlangano iyobe seyithulwa kusigungu eziphezulu sezifundazwe, amalungu esishayamthetho nomphakathi wonkana.
Lo mhlangano wenziwa nje kusanda kuphuma kombiko weSouth African Human Rights Communication (SAHRC) osole umnyango wezempilo eKZN ophansi kukaNgqongqose wezeMpilo uDkt Sibongiseni Dhlomo, ngokucindezela amalungelo abantu abanomdlavuza emuva kokuthi kufe imishini yokwelapha umdlavuza esibhedlela saseThekwin i-Addington. Lesi simo siholele ekutheni iziguli zakulesiya sibhedlela zidluliselwe esibhedlela i-Inkosi Albert Cental nayo egcine seyisebenza phansi kwengcindezi ngenxa yomthamo omkhulu weziguli ebezidinga ukulashelwa umdlavuza.
Khonamanjalo, inkampani engenye yezinkampani ezikhanda imishini yokwelapha umdlavuza, iKZN Oncology Inc iyise umnyango wezempilo enkantolo ngenhloso yokumisa ukukhandwa kwemishini yokulashwa komdlavuza e-Addington. Le nkampani yayiqashwe nguMnyango wezeMpilo eKZN ukuthi ilungise le mishini emuva kokuvela kwezinkinga phakathi kwawo nenkampani eyathengwa kuyona iTechmed Africa. Umnyango uyiswa enkantolo nje, bewusanda kuveza ukuthi izinhlelo zokuyikhanda le mishini seziqalile nokuthi kulindeleke ukuthi izinhlelo zokulashwa komdlavuza zibuyele esimeni esifanele.