Izikhalo kushaywa umhlengikazi esibhedlela
SEKUNESIKHALO ngokuphepha ezikhungweni zezempilo KwaZulu-Natal emuva kokuthi umhlengikazi eshawe yiphoyisa lesilisa okuthiwa belikhuzwa ukuthi lingachami egcekeni lesibhedlela.
Kuthiwa lo mhlengikazi ushawe yilo mlisa emuva kokuthi emkhuze echama ngaphandle kwelinye lamawodi aseduze kwasemakhazeni. Kusolwa ukuthi iphoyisa beliyobheka isidumbu sikanina obeshonele esibhedlela, lisalinde ukungena emakhazeni laphiswa wumchamo.
Umsebenzi wakulesi sibhedlela ongagunyaziwe ukukhuluma nezintatheli uthe lesi sigameko senzeke ngoMgqibelo ntambama, umhlengikazi esayongena esibhedlela.
“Umhlengikazi wone ngokubabaza athi, yibhadi lakhe ukuthi afikele kumuntu echama ngaphandle ebheke ngakuyena. Utshele lo mlisa ukuthi kungcono achame kwelinye lamathoyilethi ngaphakathi esibhedlela, wamtshela nokuthi lokhu kuwukungazihloniphi nomphakathi. Lo mlisa akabange esabuza, uvele wamshaya waze wawa. Wamushaya noma eselele phansi wamgxoba,” kusho lo msebenzi.
Uthe ngesikhathi kwenzeka lokhu bebekhona onogada besibhedlela. Uthe bazamile ukulamula esewile umhlengikazi kodwa kwanhlanga zimuka nomoya.
Kwale noma sekubizwa abanye ukuthi bazosiza.
Lo mlisa okuthiwa uyiphoyisa kwesinye seziteshi zamaphoyisa KwaMashu kuthiwa ubelokhu esabisa ngokuthu uzothatha isibhamu emotweni adubule lo mhlengikazi.
UMnuz Mandla Shabangu ongumgqugquzeli wenyunyana yabahlengikazi iDemocratic Nursing Organisation of South Africa (Denosa) KwaZulu-Natal, uthe sibashiye bekhathazekile isigameko sokuhlaselwa kwalo mhlengikazi oyilungu labo.
UShabangu uthe okubakhathazayo wukuthi onogada besibhedlela bebekhona ngesikhathi lo mlisa eshaya umhlengikazi.
“Phezu kwalokhu, bahlulekile ukumgcina (umsolwa) kuze kufike amaphoyisa. Namaphoyisa aseSydenham abiziwe, afika emuva kwamahora amathathu senzekile isigameko. Kuze kube manje akaboshiwe lo muntu naye oyiphoyisa,” kusho uShabangu.
Uthe okunye asebekhale kaningi ngakho ukuthi umnyango wezempilo uthi abasebenzi abasuke behlaselwe ezibhedlela kufanele bazivulele bona amacala. Ngokusho kwakhe kufanele engabe izikhungo yizo ezisukumela izigameko ezisuke zenzeke emagcekeni azo.
UMnuz Sam Mkhwanazi, okhulumela uMnyango wezeMpilo KwaZulu-Natal, uthe lo mnyango ushaqekile ngezinsolo zokushaywa komunye wabasebenzi bawo.
“Ngesikhathi senzeka lesi sigameko onogada bangenelele nabo babhekana nesimo esifanayo nalo msebenzi. Abasebenzi bezempilo bahlinzeka usizo olumqoka, umphakathi kufanele ubahloniphe ungabahlukumezi, asiphathi ukubashaya okuyicala. Umnyango sewukhuthaze lo msebenzi ukuthi amvulele icala umsolwa,” kusho uMkhwanazi.
Okhulumela amaphoyisa KwaZulu-Natal uColonel Thembeka Mbhele uthe alikho icala elivuliwe kodwa iveni yamaphoyisa ithunyelwe esibhedlela kwaqinisekiswa ukuthi isigameko senzeka kodwa langavulwa icala.
Unxuse ukuthi umhlengikazi aye esiteshini samaphoyisa eSydenham akhulume nomphathi siteshi ukuze athole usizo ukuze kuvulwe icala. UCol Mbhele uthe izinsolo ezibekwe iphoyisa okuthiwa lithinteka kulesi sigameko zizophenywa ngaphakathi.