Baboshwe bephethe isibhamu sethoyizi
BABOSHWE bephethe isibhamu sethoyizi abasolwa abayisithupha okuthiwa bebehlalise lubhojozi umphakathi ngokuduna izimoto, eThekwini nezinye izindawo.
Amaphoyisa angaphansi kwe-Cluster yaseThekwini abenomkhankanso wokulwa nobugebengu agcina ebophe abasolwa abayisithupha ngoLwesithathu. Baboshwe eFolweni, eMlaza nakwezinye izindawo. Abasolwa bamataniswe nezigameko zokuduna izimoto ezintathu ezenzeke eMlaza, eFolweni naseBhekithemba. Bazovela enkantolo maduze abasolwa, ngamacala okuduna izimoto, awokuthumba abantu nelokuphatha izibhamu nezinhlamvu okungekho emthethweni.
Kwizigameko ezimbili zokudunwa kwezimoto, abashayeli bathunjwa, baze behliswa eMlaza kwa-Z.
Amaphoyisa aqale lo mkhankaso ngoba ebona kwanda izigameko zokudunwa kwezimoto ezindaweni ezakhele iTheku.
Ezinye izimoto ezadunwa zitholakele ngenxa yalo mkhankaso wamaphoyisa.
Amaphoyisa akholelwa wukuthi abasolwa kungenzeka ukuthi bake kwezinye izigameko zokuduna izimoto kwezinye izindawo.
Abasolwa ngesikhathi beboshwa batholwe nesibhamu i-9mm nesibhamu esiyithoyizi okusolwa ukuthi bezisetshenziswa kulezi zigameko zokuduna izimoto. Kubasolwa kuphinde kwatholwa nezinye izinto ezalahleka ezimotweni ezadunwa okubalwa amawashi esandla, okhiye bezimoto, amafoni, utshwala nezinye izinto.
Ibamba lomkhuzi wamaphoyisa KwaZulu-Natal uMajor General Bheki Langa lincome amaphoyisa ngokubopha abasolwa nokuthola izimoto ezilahlekile.
“Usemningi umsebenzi okumele siwenze njengoba sesibophe laba basolwa, kumele sithole nabanye ukuze siqede lesi sihlava sokudunwa kwezimoto,” kusho uLanga.