Abezikole zokushayela banikwe izitifiketi
INHLANZI izoshelwa amanzi kubanikazi bezikole zokufundela ukushayela ezingekho emthethweni njengoba uMnyango wezokuThutha KwaZulu-Natal usukhiphe izitifiketi wazinika labo abaqhuba leli bhizinisi ngokusemthethweni ngenhloso yokuzibophezela ekusebenzisaneni nabo ekunqandeni inkohlakalo.
Abanikazi bezikole bamukeliswe lezi zitifiketi emcimbini obuseWestiville Civil Centre, ngoLwesibili.
UMnuz Mzwandile Zondi ongumkhulumeli wenhlangano yabezikole zokufundela ukushayela, Ubumbano Driving Schools Operators uthe ukusebenzisana nomnyango yinto ababekade beyifisa.
“Sekuzophela ngamanani okufundela ukushayela angalingani. Okusijabulisa kakhulu ukuthi njengoba sesizosebenzisana nohulumeni, akusezoba lula ukuthi noma ubani ufisa ukuvula isikole sokushayela enze njalo, kodwa sekunemigudu eqinile ezolandelwa,” kusho uZondi.
Uthe ngaphambi kokuthi umuntu avule isikole sokushayela, kuzomele aqale axhumane nososeshini kanye nomasipala afisa ukuthi isikole sakhe sisebenzele ngaphansi kwawo.
“Ukwanda kwezikole zokufundela ukushayela endaweni eyodwa, kuphazamisa ukuhamba kwezimoto. Ngakho umasipala iwona ozonquma ukuthi isekhona yini indawo ongayinika lowo muntu ofaka isicelo sokuba nesikole esifundisa ukushayela,” kuqhuba uZondi.
Uthe ezingxoxweni ababe nazo nabamele umnyango ngaphambi kokuthi kufinyelelelwe esivumelwaneni sokusebenzisana, ubathembise ukuthi labo abafundisa ukushayela bazothathwa bayoqeqeshwa kabusha ukuze ulwazi lwabo lulingane nabahlolela ukushayela.
Okhulumela uMnyango wezokuThutha esifundazweni,uMnuz Kwanele Ncalane uthe ngalokhu kusebenzisana komnyango nabezikole zokushayela kuhloswe ukuthi kukhiqizwe abashayeli abasezingeni eliphezulu ukuze kunciphe izingozi zomgaqo.
“Kuzokwenza ukuthi lezi zikole zisebenze ngokufana ziphinde zibize imali efanayo. Kuzophinde kusisize futhi ekunciphiseni inkohlakalo eyenzeka kulezi zikhungo, ngoba akuzosuka noma ubani avule isikole ngoba yilokho okwenza kugcine sekunokuqolwa kwabantu okudalwa amanani angefani,” kusho uNcalane.