Bahlonyiswe ngolwazi osomabhizinisi
BATHOLE ithuba elingandile osomabhizinisi baKwaZulu-Natal emkhakheni wokukhangisa njengoba becobelelwe ngolwazi nguMnuz Allon Raiz onenkampani ehlomisa osomabhizinisi ngamakhono abawadingayo i-Raizcorp.
URaiz ubekhuluma enkundleni yokucobelelana ngolwazi ebizwa nge-Loeries Creative Week ebiseLangeni Hotel, izolo. Utshele osomabhizinisi ukuthi akumele babe nohlelo lwebhizinisi ngaso sonke isikhathi ngoba okwenzeka uma sebesebenza akuvamile ukuhambisana nokubhalwe phansi.
“Uma uza kimi nohlelo lwebhizinisi ngivele ngiludabule phambi kwakho bese ngikubuza ukuthi uzoyenza kanjani imali. Uma uhluleka ukungitshela ngivele ngibone ukuthi asikho isidingo sokutshala imali yami enkampanini yakho,” kusho uRaiz.
Uthe izinkampani zokukhangisa ezincane zisheshe ziwe ngenxa yokuthi abanikazi bazo bazithela ngabandayo emuva kokuthola amakhasimende amakhulu.
“Ngiye ngidabuke uma ngibona izinkampani ezincane zijabulela ukuthi zithole amaakhawunti amakhulu ngoba ngiye ngizibuze ukuthi uma inkampani elethe leyo akhawunti isikhetha ukusebenzisana nabanye abantu ngabe kuzokwenzekani. Uma ngimenyiwe ngiye ngibuze ukuthi banalo yini elinye ikhasimende njengoba bejabulela leli abathi likhulu,” kusho uRaiz.
Ugqugquzele abanikazi bezinkampani ezincane kwezokukhangisa ukuthi zibe nabasebenzi abafuna amakhasimende okungenani kanye ngosuku.
“Uma ujabulela i-akhawunti enkulu uyakhohlwa ukuthi kumele ufune amanye. Kufanele usuku nosuku ubheke amakhasimende amasha ukuze inkampani ingawi. Mina nginabasebenzi abangu-130 kanti abangu-11 okuhlanganisa nami bahlale befuna amakhasimende njalo ngosuku,” kusho uRaiz.
Uthe uzoqasha abanye abasebenzi ababili eThekwini ngoba ufuna ukukhulisa inkampani yakhe KwaZulu-Natal.
“Uma ungusomabhizinisi kufanele uzihluphe ngokufuna ukukhula, uyithande nemali ngoba lokhu kuzokugqugquzela ukuthi wenze inzuzo. Uqashe abantu abawaziyo umsebenzi futhi abasebenza kanzima ngoba banomthelela ekukhuleni nasekuweni kwakho,” kuchaza uRaiz.
UMnuz Africa Tshoaedi wenkampani yezokukhangisa i-TBWA ugqugquzele osomabhizinisi ukuthi baqashe izinkampani ezincane ezenza umsebenzi ngesikhathi.
“Uma sinomsebenzi omningi siye siqashe abantu abazosenzela okunye ngesikhathi esinqunyiwe. Siye sizibuze ukuthi ngabe kufanele sibaqashe ngokuphelele yini abanye abantu abasenzela umsebenzi omuhle uma simpintshekile kodwa besingakafinyeleli kuleso sinqumo,” kusho uTshoaedi.
Kuleli sonto izikhulu nabasebenzi bemboni yokukhangisa baseThekwini kanti amaphathi athe chithi saka njengoba kuzoba nemiklomelo yokubahlonipha ebizwa ngamaLoeries eseNkosi Albert Luthuli International Convention Centre ngoMgqibelo nangeSonto.