Buyanda ubuchwepheshe
UBUCHWEPHESHE obusetshenziswa esibhedlela saseMadadeni sebunabele nakwezinye izifundazwe.
Kuleli sonto lisibhedlela nezinye zaKwaZulu-Natal zihanjelwe ngamalungu esiShayamthetho, abebheka isimo okusetshenzwa ngaphansi kwaso nokunakekelwa kweziguli.
Amalungu esiShayamthetho aye kade ehambele isibhedlela eminyakeni emithathu edlule, awazange aneliseke ngakubonile ngenxa yezinkinga eziningi esibhedlela njengokungabibikho kwabasebenzi bezempilo abanele, ukungasebenzi kwezinye izinsiza kusebenza nokunye.
Echaza ngezinkinga ezikhungethe isibhedlela, uNgqongqoshe wezeMpilo esifundazweni, uDkt Sibongiseni Dhlomo, uthe njengazozonke izibhedlela ezingekho emadolobheni amakhulu sinenkinga yokuthola nokugcina abasebenzi bezempilo, ikakhulu labo abayisipesheli.
Ukuze kuliwe nenkinga basungule uphiko olwaziwa nge-Tele-Intensive Care, okuwubuchwepheshe obuxhumanisa abasebenzi bezempilo baseMadadeni nongoti bezempilo bemikhakha eyehlukene basesibhedlela saseMgungundlovu iGrey’s.
Ongoti baphinde bacije odokotela, odokotela abasaqeqeshwa, abahlengikazi, abaluleka ngezokudla nabanye ababhekele ukunakekela iziguli ezisegumbini labagula kakhulu, i- Intensive Care Unit.
Uhlelo selusize ekutheni iziguli zingayiswa eGreys zisuswa eMadadeni kungenasidingo.
UDhlomo uthe isifundazwe iMpumalanga sesize sathatha lolu hlelo ngoba silubona lubalulekile futhi lungaba nomthelela omuhle kwezempilo.
Khonamanjalo, uDkt Imran Keeka, okhulumela iDA kwezempilo noyilungu lesishayamthetho esifundazweni, uthe kuncane kakhulu okushintshile ezikhungweni zezempilo kulesi sifundazwe kusuka begcina ukuzivakashela eminyakeni emithathu eyedlule.
Uthe iziguli nabasebenzi bezempilo basabhekene nezinkinga ezifanayo nalezo ababekhala ngazo ngo-2014.
UDkt Keeka uthe bazibonele ukuthi isimo asisihle ezikhungweni zezempilo yize uDhlomo eveza isithombe esihlukile, esithi konke kuhamba ngendella.
Uthe kwezinye izikhungo okubalwa kuzo iChrist the King, eXobho, bathole ukuthi kugcwala ngokweqile emawodini, kuphinde kusetshenziswe amaphaseji njengamawodi. Bathole nokuthi izikhala zabasebenzi azivalwa. Bakhale ngekhemisi abathe bathole ukuthi iswakeme futhi imishanguzo ayigcinwa ngendlela efanele kuyo.
Ukhale nangesibhedlela esisanda kuba sematheni ngenxa yezinkinga zokufa kwemishini yokwelapha umdlavuza eziholele ekuphazamisekeni kokulashwa kweziguli, i-Addington.
UDkt Keeka uthe kuze kube manje awulashwa umdlavuza kuso yize umnyango wethembise ukuthi imishini yobe seyilungisiwe.
“Akwamukelekile ukuthi kunezinto eziningi ezazibikwe eminyakeni emithathu eyedlule kodwa ezingakalungiswa kuze kube manje. Sizokuphakamisa lokhu emhlanganweni olandelayo nakwezinye izinhlaka,” kusho uDkt Keeka.