Ibukeka izokhanga imidlalo ye-Absa Premiership
NGEMUVA kwezinyanga ezicela kwezintathu ingabonwa imidlalo ye-Absa Premiership, kuyasuka lokho namuhla ebusuku. Imidlalo yePremiership iqala nje sekuvele kusukile ukukhuluma ngempelasonto edlule njengoba bekudlala imidlalo yeMTN 8 ka-2017. Okususe kakhulu ukuvunguzela ukuwashiswa ijezi kweKaizer Chiefs neMamelodi Sundowns abalandeli babo abebelindele ukuthi badlulele phambili kulo mqhudelwano.
Lokhu kwenza kube nzima ukuqagela ukuthi ngabe yiliphi iqembu elingase limuke nesicoco seligi ngoba ne-Orlando Pirates ibingekho kwiMTN 8 ngenxa yokuthi yehlulekile ngesizini edlule ukuzibekisela indawo kwiTop 8. Abalandeli bavele sebeqalile ukukhuluma indaba yokuthi iBidvest Wits ingase isivikele isicoco ngoba iChiefs, Pirates neSundowns akucaci kahle ngabo. Nokho kuseva ukuthi sekungaba khona amaqembu angabalwa ukuthi angase adle umhlanganiso ngoba ayikakhali impempe yokuqala yokususa isizini entsha yePremierhip ka-2017/2018.
Likhulu ithemba lokuthi imidlalo izokhanga uma kubhekwa ukuthi wonke amaqembu azamile ukuthenga abadlali elungiselela isizini entsha. Ngaphandle kwalokho i-Absa isiqhamuke neqhinga lokuheha abalandeli ezinkundleni ngokubagabisela ngo-R 1 million ozowinwa umlandeli onenhlanhla ekupheleni kwesizini. Lokhu nje kukodwa kungacishe kuqinisekise ukuthi izinkundla azishodi ngabalandeli ngoba ukuze uzibeke ethubeni lokuwina isigidi kumele ube senkundleni hhayi indaba yokuqhinsika kusofa ekhaya ubuke umdlalo kwithelevishini.
Phakathi kwezinto ezibhekiwe ukuthi abaqeqeshi abasha emaqenjini abo bazokwazi yini ukuyibamba ishisa noma kuzophela imidlalo emihlanu bakhonjwe abafika ngayo, kumbe baqome ukuzishiyela bona seyishisa insimbi. Lapha singabala uBenni McCarthy ocija iCape Town City noCavin Johnson osanda kunikwa umsebenzi wokuqeqesha AmaZulu. Abalandeli bala maqembu balindele lukhulu kubona futhi imidlalo emihlanu yokuqala ingase icacise ngekusasa labo.
Njengoba ezoziqhatha emdlalweni wokuqala unompempe namuhla ebusuku phakathi kweBidvest Wits neCape Town City sibheke ukuthi isizini ibe mnandi ingabi nezigameko ezingezinhle. Baqhathe mfoka nompempe kusuke lokho.