OwaseKZN kwiGreat SA Bake Off
INTOKAZI yaseThekwini, uZola Nene, ihlabane ngethuba eliyinqayizivele ikhethwa njengelinye lamajaji ohlelo lokubhaka kuleli, iThe Great South African Bake Off.
Isizini yesithathu yalolu hlelo izoqala ngo-Okthoba kuBBC Lifestyle, (DStv Channel 174).
Lolu hlelo lukhombisa abantu bakuleli abanethalente lokubhaka beqophisana bodwa nokugcina kuwine oyedwa ekupheleni kohlelo oluneziqephu ezingu-13.
UZola ungena kulolu hlelo ngemuva kokushiya kukaShirley Guy.
Uzojoyina amajaji okukhona kuwo uTjaart Walraven, Anne Hirsh noLentswe Bhengu naye odabuka eThekwini.
UZola uthe usekulungele ukuhlangana nabazozama inhlanhla kulolu hlelo futhi ezwe ukuthi sinjani isandla sabo ekubhakeni.
“Ngiqale ukuthanda ukudla njengombhaki nami. Kusukela lapho angibhekanga emuva futhi ngiyakuthanda ukubhaka.
“Ngijabule ukujoyina leli thimba elizosebenza kulolu hlelo olubalwa nezinye ezinkulu kuleli.
“Ngiwumlandeli omkhulu walolu hlelo kusukela lwaqala,” kuchaza uZola.
Uthe uyazi ukuthi uzokujabulela ukuba yingxenye yalolu hlelo.
“Yize sengizinze eKapa kodwa konke kwaqala ekhaya KwaZulu-Natal.
“Ukuhambela amazwe ahlukene okukhona kuwo neNgilandi, kwangenza ngathanda ukupheka ngashiya phansi ukufundela ubumeli,” kuchaza yena.
UZola uzobonakala kulolu hlelo nje, ungomunye wabapheki ohlelweni lwasekuseni kuSABC 3, i-Expresso Morning Show.