Uyazifela ngokulingisa indawo yesitabane
BESE kunesikhathi ngilandela insizwa esibonakale emidlalweni eyahlukene kwithelevishini, uThabo Malema, njengoba abanye bozakwethu babebabaza ikhono lakhe ekulingiseni.
Bebeze basho ukuthi nakanjani usefanelekile ukuba kule ngosi.
Ngithathe isikhathi ngimbuka emidlalweni eyahlukene avela kuyo, njengoba abaphathi bethu behlala begcizelela ukuthi kule ngosi kudingeka umuntu ongusaziwayo.
Ukubona uThabo emidlalweni, ezikhangisweni ngisho emafilimini amakhulu akuleli kungenze ngazama ngakho konke okusemandleni ukumthola.
Siqala ingxoxo yethu uThabo uqale wangiqhululela amahlaya, ubungafunga ukuthi ngikhuluma nosomahlaya.
Ngenyanga ezayo uzobonakala emdlalweni omusha okhuluma ngamabhanoyi, ozokhonjiswa ku-e. tv othi Easy Money.
Ekulingiseni uthe ungene ngemuva kokuthola iziqu zokuqeqeshelwa ukulingisa azithola e-Afda.
Le nsizwa ezalelwe eMabopane, ePitoli, ithe uthando lokulingisa luqale isikhulile esikoleni.
“Ngifunde esikhungweni esincane semfundo. Umsebenzi wami wokuqala wokubonakala kwithelevishini kwakuyisikhangiso sakwaLove Life ngo-2006, nokwacasula abazali bami ngoba sasikhuluma ngocansi,” kusho uThabo.
Uthe unina wadinwa ngesikhathi ebona lesi sikhangiso, wagcina emtshela ukuthi akafune omunye umsebenzi.
“Ngaqhubeka nokuthungatha umsebenzi nokwagcina ngokuthi ngithole indawo kwenye yamafilimu ethi Crime Evil. Ngemuva kwalokho ngathola indawo kwenye eyayiqoshelwa eNamibia.”
Ebuya eNamibia, uthe kulapho ajoyina khona umdlalo iGold Diggers, elingisa indawo kaRonald Gumede.
“Ngizitshele ukuthi kumele ngisebenze kanzima ukuze ngiphumelele. Kukhona konke okuqhamukayo ekulingiseni lelo thuba ngiyalithatha,” kusho uThabo.
Ubengomunye futhi wabalingisi befilimu ethi Kalushi ekhuluma ngesishoshovu esalwela umzabalazo wakuleli uSolomon Mahlangu.
“Ukuvela efilimini ekhuluma ngomuntu owalwela umzabalazo wakuleli kwasho lukhulu kimi. Into ebhaliwe emabhukwini akuleli futhi okungenza ngiziqhenye nakakhulu ukuthi igama lami likhona kulowo mlando ngeke lize licishe. Ngiyaziqhenya ukuthi kukhona engikwenzile okuthinta umlando wakithi,” kusho yena. Kule filimu, uthe ngesikhathi beqopha wayefikelwa usizi kube buhlungu uma ebona izinto ezazehlela abantu abalwela inkululeko. Ekhuluma ngendawo azoyilingisa emdlalweni i-Easy Money, uThabo uqale wahleka njengoba eveze ukuthi uzobe elingisa indawo yomuntu oyisitabane.
“Ngilingisa indawo kaCollins, osebenza endaweni yokuzicwala izinwele. Ngiyijabulele le ndawo njengoba kungokokuqala ukuthi ngilingise indawo yomuntu oyisitabane bengihlala ngifisa njengoba uWarren Masemola engihalisa kakhulu uma enikwe le ndawo ukuthi ayilingise,” kuchaza yena.
Uthe ngisho kungaqhamuka omunye umdlalo omphosa ekulingiseni le ndawo angayithatha. Uma esekhaya uThabo, uthe uthanda ukubuka amafilimu ahlukene azihlalele noyise.
“Umama angisenaye wadlula emhlabeni ngo-2013, sisele nobaba. Uma nginaye ngiyajabula futhi kumnandi ukuhlala naye sizilalelele umculo we-jazz ngimwashele nemoto yakhe,” kuchaza yena.
Kubo uthe ungowokugcine njengoba kukhona odadewabo ababili.
Uthe uwumlandeli weKaizer Chiefs futhi ipolitiki akayilandeli ngenxa yokuthi unesibongo esifana nesomholi we-EFF, uJulius Malema.
“Angiyithandi ipolitiki. Inomsindo kakhulu futhi okunye abaholi bezombusazwe balokhu begxekana bodwa ngenkohlakalo nezinye izinto eziqhubekayo kuleli okuyinto engabe bahlala phansi baqhamuka nesixazululo sayo,” kuchaza yena.
Emculweni uthe ukhule elalela abaculi abafana noMdu Masilela, Mandoza noZola ngenxa yokuthi uyazifela ngekwaito.
Emibuzweni yami yonke awusalanga owokuthi kungani le nsizwa ithanda ukubeka izinwele njengoba inesihluthu.
UThabo uvele waphela yinsini kodwa wakucacisa ukuthi bekhula uyise wayengafuni ukuthi bahlale nezinwele, wayebagunda.
Uthe esekhulile uthathe isinqumo sokuthi ngeke esagunda.