Usechithwe nayiRoyal Eagles uDrogba Ndulula
IROYAL Eagles ichitha umgadli owaduma emaqenjini aseSoweto, iKaizer Chiefs ne-Orlando Pirates, uBongani “Drogba” Ndulula.
Lo mgadli ophethe irekhodi lamagoli amaningi eqenjini lesizwe lika-Under 23 ubezama inhlanhla naleli qembu. UJames Dlamini oyimenenja jikelele ye-Eagles utshele Isolezwe ukuthi ngeke bamsayinise uNdulula.
“UNdulula ngeke asayine. Uyabonakala ukuthi kade agcina ukudlala. Izinga lakhe liphansi kakhulu. Uma simsayinisa angadlala ngemuva kwesikhathi eside. Umuntu esixoxa naye nguSiyanda Ngubo,” kusho uDlamini.
UNdulula uke wayibamba nakwiBafana Bafana. Wafaka isandla ekutheni izibekisele indawo kwi-Africa Cup of Nations (Afcon) ngo-2015 e-Equatorial Guinea.
Sekuphele isikhathi eside agcina ukubonakala enkundleni. Kumasizini amabili edlule uchithwe yiChiefs, ngemuva kwalokho wajoyina iChippa United. Nakhona akazange enze into ebonakalayo.
Uze wahamba engakaze akhombise ukuthi uphetheni.
I-Eagles emchithayo izogadulisana neThongathi ePrincess Magogo Stadium, eThekwini kusasa ngo-3 ntambama emdlalweni weNational First Division (NFD). Leli qembu lihluleke lancama ukuzibekisela indawo kumaPlay Off kula masizini amabili adlule.
Ushikishi lwemidlalo yeNFD luyasuka ngempelasonto. Komunye umdlalo olapha KwaZulu-Natal, iRichards Bay FC izobhekana neReal Kings eMhlathuze Sports Complex, eRichards Bay ngeSonto ngo-3 ntambama.
Womabili amaqembu aziqinisile izikwati zawo njengoba kuvulwe iwindi lokudayiselana ngabadlali.
IKings ithenge uRicardo Goos obegijima kwiLamontville Golden Arrows, kwathi iRichards Bay FC yahlabana ngoManti Mekoa, Khulekani Madondo, Veluyeke Zulu, Khayelihle Shozi noSiphelele Mkhulise.
Leli qembu licijwa nguRoger Sikhakhane osize iThanda Royal Zulu yadla umhlanganiso kuNFD ngesizini edlule. Lo mqeqeshi ubekelwe umgomo wamaphuzu angu-60.
Usenyusele amaqembu amabili esigabeni esikhulu kwazise iChippa United nguyena owayifaka esigabeni esikhulu. Imidlalo yeNFD: Kusasa ngo-3 ntambama: Highlands Park v Jomo Cosmos (Makhulong Stadium); Pretoria University FC v Mthatha Bucks (ABSA Tuks Stadium); Witbank Spurs v Super Eagles (Puma Stadium); Uthongathi FC v Royal Eagles (Princess Magogo Stadium); Mbombela United v Black Leopards (Kanyamazane Stadium)
NgeSonto ngo-3 ntambama: Richards Bay v Real Kings (Richards Bay Sports Stadium); Tshakhuma Tsha Madzivhadila v Cape Town All Stars (Athlone Stadium)
NgoMsombuluko: Ubuntu Cape Town v Stellenbosch (NNK Rugby Stadium, 3pm).