UKhumalo uchitha eyokuxoshwa
INGWAZI yeKaizer Chiefs, uDoctor Khumalo, ichitha eyokuthi ixoshiwe kuMakhosi njengoba izolo imenyezelwe njengenhloko yethimba labaqeqeshi kwiBaroka FC egijima kwi-Absa Premiership.
UKhumalo ubesehlale kuMakhosi iminyaka engu-30. Wafika kuleli qembu ngo-1987 njengomdlali. Uyeke ukudlala kuMakhosi ngo-2004. Ngemuva kwalokho usebenze njengephini labaqeqeshi abahlukene kuleli qembu. Izolo kuke kwavela izindaba zokuthi iChiefs ibivele ihlela ukumxosha ngoba engalisizi ngalutho iqembu.
Utshele Isolezwe ukuthi kuMakhosi uhambe ngezibusiso zikaKaizer Motaung ongusihlalo weqembu.
“Angizange ngixoshwe kwiChiefs ngifuna ukukucacisa lokho. KwiChiefs bese ngiyinhloli ngiphinde ngisize emaqenjini enkulisa. IBaroka FC ingithinte emasontweni amabili edlule. Empeleni bebefuna uThabo Senong (oqeqesha iqembu lesizwe lika-Under-20) kodwa bangamthola ngenxa yokuthi umatasa kwiBafana Bafana. Bathe beqeda ukungithinta ngaxhumana nosihlalo uKaizer Motaung.
“Ungazi ngineminyaka emithathu. Ngikhulele kuyena. Ngilapha engikhona ngenxa yakhe. Sithe uma sihlala phansi sixoxa savumelana ngokuthi leli yithuba lokuthi ngikhule. Ubesevula izandla ukuthi ngihambe. Unginikile izibusiso waphinde wangitshela ukuthi iminyango iyohlale ivuliwe kwiChiefs. Leli qembu liyohlale lisenhliziyeni yami,” kusho uKhumalo. Le ngwazi ihamba kuMakhosi nje iqembu belivele lingeseneme ngaye. Ngesizini edlule uqale wagudluzwa ebhentshini leChiefs njengoba kade eyiphini likaSteve Komphela ocija iqembu.
Kuvela ukuthi obekwenza le ngwazi ingasabonakali eqenjini wukuthi iqembu belingeneme ngokusebenzisana kwayo nelinye lamaphephandaba esiNgisi.
KwiBaroka FC le ngwazi yeChiefs izosebenza noKgoloko Thobejane noMcDonald Makubedu.
“IChiefs ingisizile ukuthi ngibe yile nto engiyiyona futhi nami ngiyisizile ukuthi ibe yile nto eyiyona. Uma ngifuna izeluleko ngeke ngisabe ukuthatha ucingo ngiluhlabe kusihlalo ngoba ufana nobaba kimina. UBobby Motaung ufana nomfowethu. Angifuni ukuqamba amanga bekungelula ukushiya iChiefs. Alikho elinye iqembu engilaziyo ngaphandle kweChiefs neBafana Bafana. Ngifunde lukhulu kwiChiefs futhi ngizimisele ngokusiza iBaroka ukuthi ngelinye ilanga ifane neqembu ebengisebenza kulona.
“Ngeneme ngaleli thuba enginike lona. Inselelo engibhekene nayo angiyesabi. Umsebenzi wami kwiBaroka wukwenza isiqiniseko sokuthi izinhlaka zokuthuthukiswa kwamakhono abafana abancane zihamba kahle, ukusebenza eduze nethimba labaqeqeshi beqembu elikhulu nokukhulisa iqembu ekutheni lihlale lisemehlweni abantu,” kusho uKhumalo.
IBaroka ivike izembe ngokudla ubhedu kuma-Play Off ngesizini edlule.
“Ngingena ekhasini elisha lempilo. Ngiyethemba ukuthi konke kuzohamba ngendlela. Umyalezo kubalandeli beChiefs wukuthi bangangidinelwa ngesinqumo engisithathile. Namanje bengisahlangana nabantu bangitshele ukuthi beseka iChiefs ngenxa yami. Kodwa ngifisa baqonde ukuthi ngisekhona ebholeni. Ngithathe leli thuba ngoba ngifuna ukukhula. Ukuya kwiBaroka akusho ukuthi sesiyizitha. Ngisazoqhubeka nokubahlonipha njengoba bengibahlonipha,” kusho uKhumalo.