UJayiya ulinde ukunikwa ithuba
AKANANDABA nokushuba kombango wezindawo umdlali omusha weKaizer Chiefs, uBhongolwethu Jayiya, onengcindezi yokuzibonakalisa kuMakhosi ngesizini ka-2017/2018. UJayiya usayine inkontileka yeminyaka emithathu kwiChiefs emasontweni edlule emuva kokwenqaba ukuvuselela abekade enayo neCape Town City abegijima kuyona ngesizini edlule. Ungomunye wabadlali abebedlalela iMpumalanga Black Aces okubunjwe ngabo i-The Citizens kaJohn Comitis ekuqaleni kwesizini ka-2016/2017. UJayiya, oyibamba ohlangothini lwesokudla, ungomunye wabadlali abashaye amagoli amathathu emdlalweni owodwa ngesizini edlule nokwenzeke iCity icoboshisa iChippa United ngo 4-1 kowePremiership. Ubanga indawo noWilliam Twala, Joseph Malongoana noKhotso Malope osanda kukhushulelwa esikimini esikhulu. UJayiya ubekhuluma ohlelweni lwethelevishini, iSport@10, ngoLwesithathu ebusuku. Uthe uyakholwa ukuthi uma enza izinto ngendlela, umqeqeshi uSteve “Mphathi” Komphela, uzombheka esikwatini esiqala imidlalo. Abalandeli baMakhosi bafuna uKomphela anikeze ithuba abanye abadlali kwazise bakholwa wukuthi bangawenza umehluko njengoba izinto zingalihambeli kahle leli qembu. UKomphela akakaze awine neyokubika indebe kwiChiefs kusukela eqale ukuyiqeqesha ngo2015 esuka kwiMaritzburg United.
“Ngenza izinto ezilula, empilweni uma wenza izinto ezisobala uyohlala uphumelela. Uma umqeqeshi enginika ithuba ngizokwenza konke okusemandleni, ngilandele imiyalelo yakhe. Ngizimisele ukudlalela ibheji leChiefs. Ngiyajabula ukuba kuleli qembu engikhule ngilithanda,” kusho uJayiya.
Amakhosi azoqala isizini ye-Absa Premiership ngokuvakashela iBloemfontein Celtic, eFree State Stadium, ngeSonto ngo-3 ntambama.
Ukuhluleka kweChiefs ukucosha amaphuzu amathathu kwiPhunya Sele Sele kungasho ukuqonga kwengcindezi kuKomphela okuvele ukuthi izikhulu bezimbekele ukuthi awine indebe yeMTN8 nokungeke kusenzeka. Leli qembu likhishwe koweMTN8 yiSuperSport United ngo 1-0 eMoses Mabhida Stadium, eThekwini, ngesonto eledlule. Kulo mdlalo, iChiefs ehlulwe kuwona yinqwaba yamathuba, uJayiya, ungene esiwombeni sesibili. “Ngingumdlali olambele ukuwina. Ngifisa ukuwina izindebe neqembu. Ngokwami lokho kudinga ozakwethu ukuthi sibambisane senze konke okusemandleni ethu,” kusho uJayiya.
ICeltic, evike izembe kunzima ngesizini edlule, iqinise isikwati sayo ngoRoggert Nyundu obedlala kuMaZulu kuNational First Division (NFD) ngesizini edlule, Ali Bondo waseKenya owayegijima kwiAjax Cape Town noJacky Motshegwa obeyibamba kwiBaroka ngesizini edlule. Ngaphandle kwalokho kuzobe kubhekwe amava omqeqeshi omusha uVeselin Jelusic waseSerbia oqalayo ukuqeqesha kwiPremiership.