AbakwaHonda nethemba ngeCR-V entsha

LIKHULU ithemba abanalo kwaHonda ngokuthi iCR-V yabo entsha eyethulwe eNingizimu Afrika izoqhubeka nokuthengwa ubuthaphuthaphu.

Selokhu le Compact SUV yethulwa emhlabeni jikelele sekudayiswe angaphezulu kuka9 million emazweni angaphezulu kuka-150.

Le CR-V entsha yesizukulwane sesihlanu banethemba lokuthi izoqhubeka nempumelelo yale moto emhlabeni jikelele. Ngibona lokhu kuzokwenzeka uma ubheka izinga le moto elikulo. Igama ngibuye ngiliphambanise neleCH-R yakwaToyota nayo eyiCompact SUV.

Uma siqala ngaphandle indlela ebukeka ngayo yinhle. Ngaphambili inamalambu amancane eLED kanjalo nawenkungu ngezansi.

Uma uyibuka eceleni kugqama ama-roof rails phezulu, i-criss ezansi kwamawindi ize iyoshaya ngemuva bese inyathela ngamasondo anamarimu angu17 inch noma u-18 inch, kuya ngenhlobo yabo.

Ngemuva inenswebu yeToyota Rav 4 kodwa yona inamalambu eLED ame ngendlela ehlukile akhuphuka abheke phezulu. Esivalweni ine chrome kuthi ngezansi ishaye ngezinqawe ezimbili kwi-1.5T.

Ngaphakathi bathi bathe ukuyivula uma uyiqhathanisa nendala.

Lokhu kwenza ukuthi abantu abade njengami bangabi nankinga ngamadolo ngoba isilulwe ngo-9cm kanjalo nasemahlombe kuvulekile.

Abagibeli abathathu abadala bangahlala ngokukhululeka ngemuva.

Nesikhala sempahla naso sivulekile, singu-522 litres futhi uma uthanda izihlalo zangemuva zilala zibe yisibaca isikhala sibe ngu-1 084 litres.

Ungafaka ngisho ibhayisikili ngendlela esikhulu ngayo isikhala. Izinto abasizebenzile ukuyakha ngaphakathi zisezingeni eliphezulu futhi ziqinile.

Phakathi nendawo ayinalo uxhaxha lwamabhathini kodwa ine-touch screen se-infotainment system esingu-5 inch noma u-7 inch, kuya ngenhlobo yakho. Ixhuma iBluetooth, AUX/uSB neHDMI.

Igiya, elizishintshayo iConstantly Variable Transmission (CVT) eliphakeme kube nenkinobho ye-handbrake eceleni.

Ku-dashboard, ezicabheni nakwi-centre console kunolayini ongathi yipulangwe engingasiboni isidingo sawo. Ngokwami bebengayishiya imnyama ngaphakathi ibe yinhle ngaphandle kwawo.

Okungithathile yindlela ethule ngayo ngaphakathi.

Phakathi kwezinye izinto ephuma nazo yikhamera ngemuva uma uhlehla, cruise control, ukhakhayi oluvulekayo ubone isibhakabhaka i-panoramic sunroof, driver infortmation interface, amalambu ayazikhanyisa uma kumnyama, ixhuma i-iPhine nge-Apple CarPlay, inezipikha eziyisishiyagalombili, isivalo sangemuva sivuleka ngebhathini nokunye kodwa kuya ngenhlobo yakho.

Injini yeCR-V ihlukene kabili. Kukhona i-2.0 Comfort ne-2.0 Elegance zozimbili ezinenjini engu-2.0 litre i-VTEC kaphethroli eyayitholakala kwiCR-V endala. Inamandla angu-113 ne-torque ka-189 Nm.

Ngo-100km bathi isebenzisa amalitha angu-7.3 kaphethroli kanti ijubane layo elikhulu ngu192km/h.

Kukhona ne-1.5T Executive ne-1.5T Exclusive zona zishaya ngenjini engu-1.5 turbo ekwiCivic. Le njini ifuqa amandla angu-140 kW ne-torque engu-240 Nm futhi idonsa ngawo womane amasondo. Ngebanga lika-100km bathi isebenzisa amalitha angu-7 kanti ijubane layo elikhulu ngu200km/h.

Zombili lezi zijini zidonsa ngo-gearbox ozishintshayo oyiCVT. Ngesikhathi sizivivinya angibanga nakho ukukhala ngalutho. I-1.5T iyezwakala ukuthi inamandla ngoba emgwaqeni iyashesha.

Ngakwezokuphepha iphuma namabhuleki e-ABS, EBD, Agile Handling Assist, Vehicle Stability Assist neHill Start Assist.

Kukhona neDriver Attention Monitor ehlola indlela umshayeli ashayela ngayo bese iyasho uma icabanga ukuthi ukhathele.

Ngicabanga ukuthi izoziphonsela inselelo izimbangi ezifana neVolkswagen Tiguan, Ford EcoSport nezinye. AMANANI

CR-V 2.0 Comfort 900

CR-V 2.0 Elegance CR-V 1.5T Executive CR-V 1.5T Exclusive R584 900 R626 900 Iphuma ne-warranty yeminyaka emihlanu noma u-200 000km neservice plan yeminyaka emihlanu noma u-90 000km.

Iphuma ne-AA Road Assist yeminyaka emithathu.