Ayikho imoto ekhetha ubulili
LWAPHINDA lwangivuka ufufunyane lofuqane olungithuma ukuthi mangisho ngengila ngithi bonke abathandi bokudumayo, ngisho nembokodo nabanye abafundi bale ngosi, abahambisanayo nayo nalabo ebanyathela amakhona, ngithi sonke masiyincenge sakuyitotobisa insimb’yomlungu sisho sijeqeze nxa zonke bese siwa ngeminwe phezu kwama-hazard ethu siyikhwebulele lapho kuphephe khona sidedele abasayothenga elabo eliwela umfula ugcwele ukuthi badlule ngokuphepha thina sibe siqhubeka nokuncinda kulolu dengezi lwezomgwaqo, sishaya ama-hazard.
Ufufunyane lwami lungikhomba ngaphesheya kwesilili, sekukaningi ngizama ukuphendula umbuzo othi ikhona yini imoto eyakhelwe ubulili obuthize. Impendulo eshaya emhloleni ihlala ithi cha. Bonke abadayisi bezimoto bayaphika ukuthi kunemoto eyakhelwe ukuthi iyothengwa abantu bobulili obuthize.
Yize kunjalo kodwa zikhona izimoto esezajwayeleka kubantu bobulili obuthize. Ake ngikwenzele umzekelo ngeToyota Rav 4, neRange Rover Evoque. Uma ucabanga leyo moto sekungathi yayakhelwe abantu besifazane ngendlela abayithande ngayo abantu besibhuda. Kodwa abahlaziyi bezezimoto bathi akukhona ukuthi yayakhelwe abantu besifazane kepha wukuthi ukuhleleka kwayo kuyazifeza izidingo zabantu besifazane njengokuba nesinqa esivulekile lapho bekwazi khona ukuhlohla imithwalo abahlala behla benyuka nayo okubalwa nezicathulo ezihlala zitholakala zisakazeke nayo yonke ibhuthi.
Ake ucabange iBMW X1. Nalolu hlobo lwemoto luthandwe kakhulu yisibhuda kanti uma ubheka nayo le moto ishaya ngebhuthi ongafaka kuyo inqama nentondolo kuphinde kusale isikhala.
Phela isikhathi esiningi odadewethu bahlala beqiqingile kukhona nezikhwama zezingane manje imoto ezoba nebhuthi encane ibaphatha kabi. Bakhona-ke nabesifazane abathanda isitayela esithi ngiyisosha elizikhuzayo othola ukuthi abakhalelwa ngane. Laboke bathanda izimoto ezifuze iMini Cooper kanti abapheli ezindaweni zobumnandi, yizigroovane zoqobo.
Ngokunjalo nezimoto ezincanyana njengoFiat 500 zikhonzwe yiwo amasosha azikhuzayo embokodo. Kunanezinhlobo ezinjengeTata Indigo nezingadlangadla zaseKorea amaKIA Sportage noHyundai Tucson, Peaguot nezinye.
Into ehlekisayo ukuthi uma sebezithengile lezi zimoto zabo, bavamise ukuziteketisa ngamagama ayela ngakwawabantu besilisa. Ngikhumbula omunye usisi engake ngasebenza naye, imoto yakhe wayeyibiza ngoJames kanti omunye uyibiza ngoGrey.
Ucwaningo lwama-hazard olukhe phezulu luthola ukuthi abesifazane kabanandaba kangako namandla emoto nobukhulu benjini yize uma kuqhamuka injeza ehamba ngemoto enenjini enkulu noma ekhombisa ukuba namandla, bayachazeka onkabi laba.
Singama-hazard siyabahlonipha abantu besifazane, sengibala nalabo abagibela izimoto ezingomagaba ngejubane nezinamandla ngoba lokho kusho ukuthi bayayiqeda kancane kancane indaba yokuthi bantekenteke omajik’ekhishini.
Ngibaphonsela inselelo ukuthi mabande abantu besifazane abathenga izimoto ezinamandla ngoba lokho kungasiza ekuqedeni le nto ohlale uyizwa ikhulunywa yithina uma sesisuthi indelelo, sithi yimoto yabafazi noma sithi yimoto yamadoda.
Akukho moto eyakhelwa abantu besifazane bodwa. Izimoto zonke ziyefana ngakho ngiye ngiyethulele isigqoko indoda ethenga iChevrolet Spark yize isinedumela lokuthi yimoto yamantombazane aqala ukusebenza.
Ngokunjalo ngimethulela isigqoko umuntu wesifazane ofana noMantombi GumedeMngadi abaqala kudala bethenga izimoto ezinamandla ohlanya. Le ntokazi yake yahamba ngeRenault Megane Sport F1, yagibela neVruuu Phah iGolf 6R.
Baningi abanye engibaziyo abagibela izilwane zikamhlola njengosomabhizinisi waseThekwini u-Okey Glen engimgcine eshaya ngengadlangadla yeHummer H3 kanti usomabhizinisi wezengqephu uLindiwe Khuzwayo yena ngimgcine ehamba ngeSLK yakwa Mercedes Benz okuthi uma uzibona ucabange ukuthi yimoto yenjeza kanti qha.
UKhanyi Mbau naye wagibela iLamborghini into eyivela kancane kubantu besifazane nakuba sazi-ke kuloyo ukuthi kwakuyimali kabani leyo. Isifazane akukhona ukuthi asizazi izimoto, ukuthi bazithanda zishayelwa amadoda bona behlala eceleni baphothe imilenze.
Umbono wama-hazard uthi abantu besifazane bangalivala igebe lokuhlonipheka nokuthatheka kancane uma bengagibela izimoto ezisabukwa njengokuthi ezamadoda. Kuye kungihlabe umxhwele ukwazi ukuthi amaCobra akhiwa uTony eProspecton eningizimu yeTheku, akhiwa ahlanganiswe abantu besifazane abamnyama.
Lezi zimoto ezingandile zishaya ngezihlekehleke zezinjini ezingoV8 noV6 kanti ziyazisho ukuthi zithi suka endleni s’thothobala uma sezichithiwe.
Njalo angilitusi ijubane kodwa ngitusa amandla. Ngiyazi kukhona abacabanga ukuthi ngiyazincengela ngoba nakhu kuyinyanga yabantu besifazane. Vele kunjalo uma ngingasazincengeli ngingaba yini, kodwa okukhulu ngibafaka umoya wokuthi mabazithenge lezi zimoto bangagcini ngokuchazwa amadoda agibela oma-M series, AMG, Mustang nezinye kodwa mabazithengele bona.
Uyobona imisila igoqana kulabo bethu abacabanga ukuthi badinga ukukhulunyelwa yizimoto ukuze bakwazi ukuwina. Angisho ukuthi akekho umuntu wesifazane ogibela lezi zinhlobo ezinamandla kodwa ngithi akwanele.
Sengikhathele ukuthi njalo uma ngibona iM4 sengiyazi-ke ukuthi iqhoqhobelwe yindoda eceleni kuhleli usisi omuhle ofudumeza isihlalo. Ake sibone bona labo mthakathi wezindaba beqhoqhobelwe yisibhuda ngaleyo ndlela amandla aso azoqina futhi akudingi uhambe nomuntu wesilisa uma uya ezindaweni, qhamuka uhamba nabanye osisi noma wedwa khona kuzoshwabana igqabho emagwaleni esilisa. Ngaleyo ndlela niyobe seniwathathile amandla enu mbokodo.
Nezinkampani ezidayisa izimoto aziyeke ukukhuluma namadoda njalo uma zikhangisa imoto enamandla, ake zifake abantu besifazane hhayi njengamathuluzi emizwa yocansi kodwa njengabantu abahloniphekile abanamandla okuthenga noma yini abayifunayo.
Hhayi-ke selwehlile ufufunyane lwami futhi sengibhodlile. Ngivumeleni ngithi asiwavale okwanamhlanje ama-hazard ethu ngethemba lokuthi isifazane esesiphumelele sizobhukula siqinise imasela emgwaqweni, ngiphinde ngicele ngize ngiguqe ngedolo phansi ukuthi masingakhohlwa ukugcina yonke imithetho yezokushayela injengoba injalo ukuze siphinde sihlangane sisawuphonsa umbalane nangesonto elizayo kuyo le nkundla.
Uma usafuna siyiqhube le ndaba ngena ekhasini lethu Igedlela Lami with Sthembiso Shangase kuFacebook. Yimi owenu nali ikheli ngezansi hazardiso@gmail.com