Lidumela emasumpeni ngowezimoto
NJENGOBA selidumela emasumpeni ngomshikashika wokukhetha imoto yonyaka emncintiswaneni i-2018 WesBank South African Car of the Year, ngeke ngithuke uma ngibona igama leHyundai Elantra libalwa nezinye ezihamba phambili.
Asekhethiwe amajaji akulo mncintiswano waminyaka yonke futhi ngaphambi kokuphela konyaka kuzomenyezelwa izimoto ezisesigabeni sowandulela owamanqamu.
Uma kuwukuthi i-Elantra igcina ingenile embangweni, izobe ifuna ukuphinda eyakwenza ngo2012 njengoba yanqoba. Nakulokhu angikuboni okungayivimba ukuthi yini engayenza ingabi sembangweni ngoba iyimoto eseqophelweni eliphezulu.
Ihlukene ngezinhlobo ezine okuyi-1.6 Executive Manual, 1.6 Executice Automatic, Elantra Elite ne- Elantra 1.6 TGDI Elite DCT Sport.
ISport ngaphambili sishaya nge-grille yaso eyi-hexagon emnyama yabe isiqoshwa uTurbo obomvu. Ngezansi kwamalambu kunamaLED Daytime Running lights, akhanya ubusuku nemini. Amarimu ayo angu-17 inch.
Ngemuva inezinqawe ezimbili ezigqize nge-chrome kanjalo nasezimbanjeni zokuvula izicabha. Ngisakuzo izicabha, uma usondela nokhiye izibambo ziyakhanya ukuze uzibone kahle futhi nezibuko ziyavuleka njengoba zisuke zivalekile uma ikhiyiwe.
Asikho isidingo sokulokhu uciphiza ukhiye ukuze ivuleke ngoba inebhathini elimnyama esibanjeni oliciphazayo bese iyavuleka ngesilungu abakubiza nge-keyless entry.
Ingaphakathi layo ngaphambili liyefana nezimoto zakwabo ezintsha kodwa yona ishaya ngezihlalo ezingama-sports seat ezibomvu futhi inezitishi ezibomvu kwi-armrest nangasegiyeni.
Abagibeli bahlala ngokukhululeka futhi inodedangendlale webhuthi bese iba nezindawo zokubeka iziphuzo ngaphakathi phakathi nendawo nasezicabheni.
Ine-8 inch infotainment system ne-satellite navigation, USB Mirror Link kumaselula e-Android, HDMI yokuxhuma i-iPhone ukuze i-screen sivele kuyo, Bluetooth, Aux/USB futhi idlala neCD.
Idunyiswa ngebhathini, inecruise control, rear park assist, amawindi kagesi futhi nezibuko emaceleni nazo zihlelwa ngogesi futhi iyazishaya ama-wiper uma imvula ina.
Injini yayo ingu-1.6-litre turbocharged petrol ekhahlela amandla angu-150kW ne-torque engu-265 Nm. Ino-7-speed Dual Clutch Transmission nama-paddle shifters ngemuva kwesiteringi, othi uma usushintsha kuwena uzizwe ukuthi cha awushayeli i-Elantra eyejwayelekile kodwa yiSport.
Umshayeli ukwazi ukukhetha ukuthi ayifake kuNormal, Eco noma uSport.
KuSport uyayizwa ukuthi kuba wukunyathela kancane bese iyagxuma, engikuqaphelile wukuthi nophethroli nawo uhamba ngamandla.
Uma uyisebenzisa nsukuzonke kusiza wona u-Eco ukuze yonge kuphethroli.
Ayizwakali uma ifaka amagiya noma futhi isisejubaneni ngoba umsindo wangaphandle mncane ngaphakathi.
Ne-suspension yayo iyenza ukuthi abagibeli babe ntofontofo ngaphakathi. Emakhoneni ayisokoli nakancane.
Ngakwezokuphepha ineAdvanced Braking System (ABS) ne-Electronic Braking Distribution ne-Eletronic Stability Programme.
Iphinde ibe nama-airbag omgibeli, umshayeli namacurtain airbags. Inani Elantra 1.6 TGDI Elite DCT R399 900. Iiphuma ne-warranty yeminyaka emihlanu noma ibanga lika-150 000km, service plan yeminyaka emihlanu noma ibanga lika-90 000km ne-roadside assistance yeminyaka emihlanu noma ibanga elingu-150 000km.