Kuthungathwa abazoba sohlelweni iSpeed Stars
USUQALILE umshikashika wokuthungatha abashayeli abazoba yingxenye yohlelo lwakuIgnition TV (DStv channel 189), iSpeed Stars.
Ukubhekwa kwamalungu omphakathi kuzoqhubeka kwiSkid Pan seVolkswagen kwiSouth African Motoring Experience, eKyakami Grand Prix Circuit, ngoSepthemba 2 noSepthemba 3.
Abantu bazonikezwa amathuba amathathu okuthi bazame ukucushisa iVolkswagen Up! enkundleni. Ababili abaqophe izikhathi ezimbili eziphambili bazodlulela emzuliswaneni olandelayo.
Ngesikhathi kwethulwa uhlelo ngoMgqibelo, i-skidpan saseZwartkops Raceway yisona esisetshenziselwe ukuthi kuqale ukuthungatha amalungu omphakathi azoba kwiSpeed Stars.
Amalungu omphakathi abezimisele ukukhombisa ithalente lawo lokushayela kwigymkhana.
Ekugcineni kosuku uKennedy Mogotsi, indodana yakhe uJonathan Mogotsi eyanqoba iVolkswagen Driver Search ngonyaka odlule futhi okumanje ishayelela iVolkswagen Motorsport kwi-Engen Volkswagen Cup Series, uyena obe phambili ngesikhathi semizuzwana engu-33:61. Ngemuva kwakhe kube nguLuke McDowell obeke imizuzwana engu-34:15.
Kwisizini yesithathu yeSpeed Stars amalungu omphakathi azoncintisana nosaziwayo okubalwa kubo osomahlaya uJoey Rasdien noDonovan Goliath noLuvo Monyango ongumpetha womhlaba kwi-long jump.
Ngonyaka odlule ngesikhathi kuthungathwa abantu abazoba yingxenye yalo mncintiswano kwatholwa abangu-16 abagcina sebencishisiwe baze baba bane. Isizini edlule yanqotshwa yilungu lomphakathi uSandro Godinho.
Imenenja jikelele yezokuxhumana kwaVolkswagen South Africa, uMatt Gennrich, uthe bayaziqhenya ngokuba ngabaxhasi beSpeed Stars wathi uhlelo alugcini kuphela ngokujabulisa abantu kodwa luphinde luhlanganise nezokuphepha nokufundisa abashayeli.
“Uma unelayisensi yokushayela futhi ungenawo amava okushayela izimoto zomjaho, ngiyakunxusa ukuthi uhlanganyele nathi endaweni yeVolkswagen kwiSouth African Motoring Experience ukubona ukuthi ungakwazi yini ukushayela kangcono kunosaziwayo bethu,” kusho uGennrich.