Sisengenza kangcono - Coetzee
BAKE bakhohlwa nokuthi amakhaza abeshubisa umkantsha abathandi bombhoxo abebeseNelson Mandela Bay Stadium, ePort Elizabeth, ngesikhathi amaBhokobhoko ebafudumeza ngomdlalo okubeka kucace ukuthi amadimoni angonyaka odlule kumqeqeshi weqembu u-Allister Coetzee ayinto esidlule.
Ngemuva komdlalo wokuvula isizini entsha yeRugby Championship, amaBhokobhoko ayivule ngewini ka 37-15 ku-Argentina, uCoetzee uzichaze njengomuntu owanelisekile. Yize ethe wanelisekile ngomphumela uphinde wathembisa abalandeli ukuthi kusekuncane lokhu abakubonile.
AmaBhokobhoko abe nonyaka omubi ngesizini edlule okuze kwaholela ekutheni kube nabathile abangabaza ukuqashwa kukaCoetzee. Nokho indlela abayiqale ngayo iChampionship, abazoyibanga ne-Argentina, New Zealand ne-Australia, ithembisa kakhulu.
“Ngijabule ngoba siwinile. Ngeneme ngoba sidlale kahle kodwa ngokwami kukhona okukhulu kakhulu okungcono esingakwenza. Siqale kahle. Osekusemqoka manje wukuthi siqhubeka kanjani nomqhudelwano.”
Bese kungokwesine ewina kulo nyaka kwazise uzidlele amahlanga kwiFrance ebimvakashele ezinyangeni ezimbili ezedlule.
Akazange athande ukusho amagama abadlali abamhlabe umxhwele kodwa ngeke kwafihlwa ukuthi abadlali abafana noCourtnall Skosan, Siya Kolisi no-Elton Jantjies bebegqame ngendlela ehlukile kweyabanye.
UCoetzee uthe baphatheke kahle kakhulu ePort Elizabeth kangangokuthi baqome ukuhlala kuze kube uLwesithathu abazokuya ngalo eSalta, e-Argentina ukuyolungisela umdlalo wangempelasonto lapho bezophinde badlale ne-Argentina.
“Phakathi kwezinto esizishintshile kulo nyaka ukuthi sesizokhetha thina ukuthi sihamba nini ngoba ngonyaka odlule besizithola sikhathele isikhathi esiningi kucace ukuthi besingahlelile kahle. Silindele umdlalo onzima kakhulu eSalta ngoba womabili amaqembu azobe engashintshile kangako. Kuzoba wumdlalo onzima kodwa uma sikwenza ngendlela lokhu esikwenze ekhaya, nakanjani sizolokhu sihleli endaweni enhle ku-log,” kusho uCoetzee.
Isiyonke imiphumela yeRugby Championship ihambe kanje:
Australia 34-54 New Zealand; South Africa 37-15 Argentina.