Uphiwe emidlalweni ehlukene
KWAYENA uyahluleka ukuchaza ukuthi kwenzeka kanjani ukuthi aphiwe ngendlela efanayo emidlalweni enhlobonhlobo engaphezulu kwemihlanu u-Azania Zungu (10) waseMeerensea, eRichards Bay, odle umhlanganiso wokuba ovelele kwiLets Play ngoJulayi.
U-Azania, ofunda uGrade 4 eRichards Bay Christian School, uthe unekhono ngendlela efanayo kwi-hockey, ithenisi, unobhutshuzwayo, ezokubhukuda, ezokusubatha kanti ukhona naseqenjini lekhilikithi. Uthe kwayena ngeke achaze ukuthi lokhu kwenzeka kanjani kodwa unina, uCharmaine Zungu, nguyena owenza izinto zenzeke.
“Ngeke ngikwazi ukucacisa kahle ukuthi zenzeka kanjani zonke lezi zinto ngoba phakathi nazo kukhona izikhathi zokuziqeqesha, imidlalo kanti nomsebenzi wesikole umile. Iqiniso wukuthi umama nguyena owazi konke futhi uyena ohlela ngendlela okufanele kwenzeke.”
Nonina uphume emsebenzini waba khona ngesikhathi u-Azania evakashelwe emuva kokunqoba kwakhe kwiLets Play kaJulayi.
“Kuyona yonke imidlalo engiphiwe kuyona, i-hockey iyona engiyizwa ngaphakathi kodwa akuyona enginekhono kakhulu kuyona. Lapho ngizwa khona sengathi ngiphiwe kakhulu isekubhukudeni kangangokuthi uma kungathiwa angikhethe ukudlala into eyodwa ngingagxila kwezokubhukuda. Kumnandi futhi kungenza ngizizwe ngikhululekile,” kusho u-Azania onesifiso sokuba umdlali okhokhelwayo emidlalweni eyahlukene kodwa futhi uzogxila esikoleni ngoba uyakuthanda nokuba wudokotela obhekene nabadlali emikhakheni enhlobonhlobo.
Unina, uCharmaine uthe: “Akukho engingakwenza ngoba uyingane yami futhi akudingi usosayensi ambone ukuthi uphiwe kwezemidlalo. Ngikhuluma nawe nje ekuqaleni kwenyanga ezayo uyoqhudelana ngokubhukuda. Ngithuke kabi ngendaba yethenisi ngoba bengingamazi ukuthi nakhona ukhona. Okuhle kakhulu wukuthi akehli kumamaki esikoleni. “Ngiyazama ngakho konke okusemandleni ukuthi izinto zenzeke. Akwethusi ukuthi abe nekhono emidlalweni eyehlukene ngoba nami ngikhule nginjalo. Umalume wakhe wayedlalela iqembu lesizwe le-hockey kanti uyise uneqembu lebhola. Imidlalo yinto ephambi kwakhe ngaso sonke isikhathi.”