Kubhuntshe umshado kubulawa obezogcagca
KUBHUNTSHE umshado ngempelasonto kubulawa umhlengikazi waseSnathingi, eMgungundlovu, ephuma kokwenza ikhanda elungiselela ukushada.
Isidumbu sikaNksz Nompumelelo Ngubane (37) sitholwe emotweni eklinyiwe, eseshonile ngoLwesihlanu ebusuku.
NgoMgqibelo bekulindeleke ukuba ziwushaye kuyena nowesilisa athandana naye osebenza kwesinye isibhedlela esiseMgungundlovu.
Umshado ubuzoba seGolden Horse Casino eMgungundlovu, ngoMgqibelo.
Lo wesifazane obesebenza esibhedlela e-Edendale kuthiwa utholwe ngo-6 ebusuku KwaPata eseshonile, eyedwa emotweni yakhe kuthathwe isikhwama sakhe semali nefoni.
Udadewabo kamufi, uNksz Nondumiso Ngubane uthe: “Ubezoshada ngoMgqibelo. Ubehambe ekhaya eyokwenza ikhanda. Sithole umbiko wokuthi useshonile. Amalungu omndeni abevele efike ngoLwesihlanu, sibe sesiwatshela ukuthi umshado awusekho ngoba umakoti usetholwe ebulewe. Sikubeke emaphoyiseni konke ngoba asazi ukuthi kwenzakaleni.”
UNksz Ngubane uthe udadewabo ubengenazo izitha kodwa kukhona incwajana abayithola imsabisa ngokuthi angashadi.
“Noma ngingasayikhumbuli incwadi ukuthi yayithini kodwa sayithola endlini singazi ukuthi ilethwe ubani. Sayikhuluma indaba yayo yadlula,” kusho uNksz Ngubane.
Isolezwe lithole ukuthi umyeni walo wesifane uvele unaye unkosikazi, abasebenza naye esibhedlela eGreys.
Umufi kuthiwa ubezongena esithenjini kanti ubevele esenezingane ezimbili nalo wesilisa abezoshada naye.
UNksz Ngubane uthe bona abanalo ulwazi ngalokho.
“Esikwaziyo ukuthi udadewethu ubezoshada noyise wezingane zakhe. Okunye sekungaba uphenyo lwamaphoyisa,” kusho uNksz
Ngubane. Imizamo yokuthola umyeni kamufi ayiphumelelanga njengoba ucingo lwakhe beluvaliwe izolo. Okhulumela amaphoyisa KwaZulu-Natal uLt- Colonel Thulani Zwane uthe baphenya icala lokubulala.
“UNksz Ngubane utholwe emotweni ebulewe KwaPata ngo-6 ebusuku. Ngokophenyo olusenziwe ubeklinyiwe. Ayaziwa imbangela yokubulawa kwakhe. Akekho oboshiwe kodwa uphenyo luyaqhubeka,” kusho uZwane.
Isolezwe lithinte isibhedlela izolo, lakhuluma nomhlengikazi ongagunyaziwe ukukhuluma banezindaba ongathandanga negama lakhe othe badumele ngokwenzekile
“Besithenge imiswenko sizimisele ngomshado, sidumele sekubikwa ukuthi ushonile. Kubuhlungu kakhulu okwenzekile,” kusho umhlengikazi.