Aphelile amathikithi omcimbi kaLady D
ASEPHELILE amathikithi omcimbi ohlelwa umsakazi woKhozi FM, uDudu ‘Lady D’ Khoza, ozoba ngoMgqibelo, eMhlanga, eThekwini.
Lo mcimbi okuzobe kuhlangane kuwo abantu besifazane ubizwa ngokuthi, Dinner With Dudu Khoza, ngaphansi kwesiqubulo esithi: “Women On The Rise, I’m More Than A Woman”.
Uzoba se-Unique Lifestyle Cafe, eMhlanga.
Ekhuluma neSolezwe uDudu uthe, kulo mcimbi kuzobe kukhona izikhulumi ezingabangani bakhe, abazokhuluma ngezinto ezehlukene.
“Kukhona intombazane okuthiwa uLasandra ezobe ikhona, iyona kuphela engeyena umngani wami. Laba abanye abangani bami kodwa abazile ukuzokhuluma ngami. Bazokhuluma ngezinto ezahlukene ezithinta abesifazane. Lolu wusuku engifuna sizuze ngalo sonke singabantu besifazane, sivale inyanga yethu ngegiya eliphezulu.”
Uthe kwabesifazane ababizile kukhona ngisho nabukela kubo, abone ukuthi bangaba usizo.
“Izinto abazozikhuluma zingasiza nabanye abazobe bekhona. Ngibonela okuningi kubo yingakho ngikhethe ukuba babe yingxenye yalo mcimbi,” kuchaza uDudu.
Uthe abesifazane abazobe bekhona baqhamuka emikhakheni eyahlukene kuleli.
“Ngisho abazobe benandisa kukhona engikubonile kubo, okungaba usizo,” kuchaza uDudu.
Lo mcimbi uDudu uthe, uzoqala ngo-6 ntambama uphele ngehora leshumi ebusuku.
Phakathi kwabesifazane abazobe bekhona uDkt Nonhlanhla Mkhize onguMqondisi Jikelele ehhovisi likaNdunankulu KwaZulu-Natal, uMillicent Zuma onguSihlalo kuzwelonke wenhlangano iDeaf Woman SA noLasandra.
Uhlelo luzobe luphethwe nguJacinta Ngobese owayengumsakazi weVuma FM.
Kuzobe sekunandisa uDJ Le Soul noZandi Khumalo-Gumede.