Umndeni wephoyisa ufuna kuboshwe umsolwa
UFUNA kuboshwe abasolwa umndeni wephoyisa laseMtshezi elitholwe libulewe emotweni yalo ngempelasonto.
Isidumbu sikaConstable Zanele Sibiya (26) sitholwe emotweni yakhe ngoMgqibelo sisesihlalweni sephasenja sinenxeba lokudutshulwa.
Isolezwe lithole ukuthi emotweni yakhe akukho obekuthathiwe futhi bekungekho muntu omunye.
Imoto yaleli phoyisa ibimiswe eceleni komgwaqo, ikhanyiswe amalambu, kungathi ifile. Abashayeli abaningi kuthi bebeyidlula, kwaze kwafika umuntu mumbe okunguyena ohlabe umkhosi ngesigameko.
Kunezinsolo zokuthi umufi ubulewe kwenye indawo wabe esebekwa emotweni yakhe.
Udadewabo omdala uNksz Samkelisiwe Sibiya uthe bafuna umbulali aboshwe ukuze aphendule.
“Simangele ngoba ubengenazo izitha futhi akekho obemsabisa udadewethu. Besisalindele lukhulu kuye ngoba unonyaka esebenza emaphoyiseni. Udadewethu wahamba ekhaya eya kumngani wakhe ngoLwesihlanu. Asazi-ke ukuthi kukhona yini lapho adlula khona ngoba wayehamba yedwa. Besisathukile ukuthi kungani engabuyi, sabe sesithola umbiko ngoMgqibelo ukuthi ubulewe,” kusho uNksz Sibiya.
Okhulumela amaphoyisa KwaZulu-Natal uLt Colonel Thulani Zwane uthe baphenya icala lokubulala.
“Imbangela yokubulawa kwalo wesifazane ayaziwa. Kuvulwe icala esiteshini saseMtshezi. Uphenyo lwamaphoyisa lusaqhubeka,” kusho uZwane.
Isolezwe lithole ngomthombo osondelene nalolu daba ukuthi leli phoyisa belinobudlelwane nelinye iphoyisa abebesebenza nalo esiteshini saseMtshezi.
Leli phoyisa kuthiwa bebungasebuhle ubudlwelwane babo njengoba ubehlala ngokumhlupha emfuna ibhande lakhe lebhulukwe. Leli bhande kusolwa ukuthi wayelishiye kumufi.
Udadewabo waleli phoyisa uthe ngokwazi kwabo abukho ubudlelwane obuqinile ayenabo nowesilisa njengoba bewumndeni bebengazi ngesoka lakhe. Umufi ushiye izingane zakhe ezimbili.
Ukubulawa kwaleli phoyisa kulandela ukubulawa kwephoyisa lesifazane laseJozini, okusolwa ukuthi ladutshulwa yisoka lalo nalo elalisebenza esiteshini saseJozini, elagcina lizidubulile. Izidumbu zabo zatholwa zisemgwaqweni eduze komqasho wephoyisa lesifazane.