Bashaqekile ngogwazwe kaningi elele nezingane

USASHAQEKILE umndeni wowesifazane waseNanda okuthiwa ubhokodwe ngommese amanxeba amahlanu endlini enezingane zakhe.

UNksz Nelisiwe Bhengu (28) kuthiwa ubulawe ngeSonto ekuseni.

Kusolakala ukuthi uNksz Bhengu ungenelwe umuntu endlini wabulawa elele nezingane zakhe ezimbili, eneminyaka emithathu neneminyaka emihlanu.

Udadewabo omdala, uNkk Nana Magubane uthe uthole ucingo ngezikhathi zasekuseni ngeSonto lumbikela ukuthi udadewabo akasekho emhlabeni.

“Ngiphuthume endlini abehlala kuyo nezingane zakhe nobaba wazo ngamfica elele phansi enamanxeba amaningi okugwazwa. Ubevuvukele emzimbeni kubukeka sengathi wophele ngaphakathi. Namanje kusenzima ukwamukela okwenzekile,” kusho uNkk Magubane.

UNksz Bhengu kuthiwa ubenamanxeba okugwazwa emqaleni, esifubeni, nasesiswini.

Endlini yakhe kuthathwe ithelevishini, i-amplifier, isikhwama semali sikayise wezingane zakhe, neselula.

UNkk Magubane uthe uyise wezingane zikadadewabo wayengekho endlini ngesikhathi kwenzeka isigameko wayehleli nesinye isihlobo sabo. Ubuyele endlini ngoba ebona kubhakuza ikhethini, ezitshela ukuthi izingane zidlala ngalo ngoba bezivame ukuhlala kuze kube sebusuku kakhulu zibuka ithelevishini. Uthe wafica ukuthi sekukhishwe i-sliding door wabe esebona ukuthi ithelevishini ayisekho, wabona uNksz Bhengu elele phansi kunegazi.

UNkk Magubane uthe bakhathazekile ngezingane ngoba yizona ezabona unina ekulesi simo kuqala, yize zazilele ngesikhathi kwenzeka isigameko.

Uthe okunye okubakhathazayo wukuthi kukhona umlisa osolwa amalungu omphakathi asabisa ngokugcina ezibambela umsolwa.

“Sifisa sengathi umthetho ungenza umsebenzi wawo, aboshwe othinteka ekufeni kwakhe. Asifisi ukuthi umphakathi ugcine wenza okumele kwenziwe abomthetho,” kusho uNkk Magubane.

Uthe uzitshele ukuthi akafuni nokumazi okuthiwa usolwa wumphakathi ngoba ethi akafuni ukuphazamiseka emoyeni.

Ukhale ngokuthi abazi nokuthi bazokwenzenjani ukusiza izingane eziphazamisekile ngenxa yokubona unina elele edamini legazi.

Okhulumela amaphoyisa KwaZulu-Natal, uLt Col Thulani Zwane ukuqinisekisile ukuthi amaphoyisa aphenya icala lokubulala nokuphanga kodwa akukaboshwa muntu.

Uthe uNksz Bhengu ubenamaxeba okugwazwa amabili emqaleni, amabili esiswini, nelilodwa emhlane.

Unxuse abantu abangaba nolwazi ngabasolwa ukuthi bathinte amaphoyisa ku-08600 10111.

Isithombe: SITHUNYELWE UNKSZ Nelisiwe Bhengu obulawe ngokubhokodwa ngommese elele nezingane zakhe endlini.

THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.