ISilo sikhwele sadilika kubaqhafi bothisha
ISILO samabandla uGoodwill Zwelithini sikhwele sadilika kothisha abangazihloniphi abadakwa wutshwala emphakathini sathi behlisa isithunzi soMnyango wezeMfundo.
Sikhuluma ngesikhathi sihlangene nothishanhloko abawu- 700 bezikole zezifunda ezimbili eKZN (Majuba neZululand) esiShayamthetho esidala oLundi izolo, Isilo sithe kusiphatha kabi ukuthi igama lothisha emphakathini lihlanganiswa nezidakwa.
“Abafuneki othisha abaziwayo emphakathini ukuthi bayadakwa ngoba benza umsebenzi omkhulu wokwakha isizwe. Othisha kumele njalo bahlale bezihlonipha ukuze bagcine isithunzi sabo nesomnyango,” kusho Isilo.
Noma bangaphuza othisha kodwa akumele baphuze emphakathini.
Siphinde sakhala ngothisha abangenalo ubizo lokufundisa abaya ngoba nakhu bentula umsebenzi.
“UMnyango wezeMfundo akusiyo indawo yokuquba kulabo abangasebenzi, ubuthishela kumele benziwe ngabantu abanobizo,” kusho Imbube.
Isilo siphinde sazwakalisa ukukhathazeka mayelana nothishanhloko abangazi lutho.
Sithe isikole esingenaye umholi sibonakala ngemuphumela emibi.
Othisha kumele bahlukane nepolitiki yezinyunyana kodwa banake umsebenzi wabo wesikole.
Sinxuse abazali nomphakathi ukuthi bangavumeli izikole ziphendulwe imihhume yabaphangi.
“Abafundi badakwa wutshwala ezikoleni, badla nezidakamizwa baze bagxize amathe bese bejahana ngemimese nezibhamu kugcine sekuphazamiseka ukufunda.”
Sinxuse umphakathi ukuthi uvikele izikole emidlwembeni ehlukumeza othisha nabafundi.
“Ngesikhathi sethu babengekho onogada ezikoleni, onogada kwakungumphakathi, otsotsi babengadlaleli ezikoleni ngoba babazi ukuthi bazoyisutha Durban induku. Washonaphi umphakathi owawazi ukuthi izigebengu zenziwani njengoba ezikoleni zethu sekwaba yikwampunzedlemini.”
Sithe siyazi ukuthi othisha nabo banawo amaphutha kodwa lokho akusho ukuthi kumele bahlukunyezwa.
Sinxuse othisha ukuthi baqale ukutshala imbewu kubafundi emazingeni aphansi ukuze balindele imiphumela emihle kwa-matric.
“Awukwazi ukulindela ukuthi uzoqhamuka usuvuna ube ungazange utshale, kubalulekile ukuthi abafundi baqalwe emazingeni aphansi.” Durban