Othisha abalova bangaziwa ukuthi bakuphi ‘bazoxoshwa’
UNGQONGQOSHE woMnyango wezeMfundo KwaZulu-Natal, uMnuz Mthandeni Dlungwane uxwayisa othisha abalovayo bangaziwa ukuthi bakuphi ngokuthi bazoxoshwa emnyangweni.
Ekhuluma nothishanhloko oLundi izolo, uDlungwane uthe othisha asebelove izinsuku ezingu-14, bengaziwa ukuthi bakuphi sebefana nabazixoshile. Uthe abakwazi ukufuya abantu abangawenzi umsebenzi wabo kodwa bebe bekhokhelwa. “Ngiyabaxwayisa othisha abalovayo, bazibeka engcupheni yokuthi baphelelwe wumsebenzi.”
Uthe nothishanhloko izikole zabo ezingenzi kahle bazobathathela izinyathelo.
Okhulumela uDlungwane, uMnuz Kwazi Mthethwa uthe bangu-300 othisha asebekhonjwe indlela emnyangweni ngenxa yokungaziphathi kahle, kubalwa namacala okulova.
UDlungwane uthe uyajabula ukubika ukuthi usexoshiwe uthisha waseKucabangeni High, eNquthu osolwa ngokudlwengula abafundi.
UMnuz Thabani Rats Hadebe waba ngundabamlonyeni nyakenye ngemuva kokuvela kwe-video ezitika ngocansi nokwakuthiwa ngabafundi. Usagcinwe ezitokisini njengoba icala lakhe lisenkantolo.
UDlungwane uthe kulo nyaka bazimisele ngokuthi bathole u-76% ka-matric. Uthe ukwenza kahle kweKZN ku-matric kwenza ukuthi inyuke ezweni lonke imiphumela. I-KZN ngesinye sezifundazwe ezinabafundi abaningi eNingizimu Afrika. Ngonyaka odlule lesi sifundazwe sithole u-56% ku-matric.
UDlungwane uthe banethemba lokuthi kulo nyaka bazokwenza kangcona kakhulu.
Esinye isikhulu eMnyangweni wezeMfundo uDkt Barney Mthembu sithe ngokomsebenzi asebewenzile kusukela kuqale unyaka akangabazi ukuthi bazokuzuza lokhu abakuhlosile.
UMthembu uthe isifundo esibanika inkinga iBusiness Studies, wengeza ngokuthi zonke izifunda zaseKZN zehlile kulesi sifundo.
Uthe abafundi baseKZN benza kahle kwiEnglish nakwiHistory..
Uthe kubaphatha kabi ukuthi abafundi abaningi basahluleka ukuthola u-100% kwisiZulu yize kuwulimi lwabo lwebele.
UMthembu uthe iKZN iyaziwa ukuthi ihlale inabafundi abenza kahle kwi-Maths neScience.
Isilo samabandla uGoodwill Zwelithini siphonsele inselelo uMnyango wezeMfundo KwaZulu-Natal sathi sifuna uthole u-80% kulo nyaka, ngonyaka ozayo kube ngu100%.