Bangaphezu kuka-30m abantu abahluphekayo
BANGAPHEZULU kuka-30 million abantu abahluphekayo eNingizimu Afrika.
Lokhu kusho ukuthi u-55.5% wabantu abawu-56.52 million bayahlupheka. Abangcono bawu-45.5%.
Izibalo zidalulwe nguMnuz Pali Lehohla, oyiStatistician-General izolo ePitoli ededela izibalo zokuhlupheka kwabantu kuleli kusuka ngo-2006 kuya ku-2015.
ULehohla uthe u-55% ukhomba ukuthi siyakhula isibalo sabahluphekayo uma uqhathanisa neminye iminyaka.
“Abantu abamnyama yibona abasabhekene nenhlupheko. Imfundo yiyona ndlela engabakhipha ebubheni. Abantu abathathu kwabahlanu abamnyama bayahlupheka. Uma ubheka izibalo azikho ezitshengisa abamhlophe abahluphekayo. Abesifazane nezingane yibona bantu abaseqhulwini lwabantu abahlupheka kakhulu.”
Izifundazwe i-Eastern Cape, Limpopo neKwaZulu-Natal zinezibalo eziphezulu zabahluphekayo. Izifundazwe iGauteng, Western Cape abantu basaqhubeka nokuthutheleka kuzona.”
Uthe kumele kucatshangelwe izingane okuyizo ezidonsa kanzima.
“Kumele sicabangele ikusasa lezingane ezingaphansi kuka-17 ezihluphekayo. Uma lezi zingane zihlupheka alikho ikusasa. Iningi lazo lihlala emakhaya ikakhulu e-Eastern Cape naseLimpopo.”
Uthe mancane amathuba okuthi izingane ezihluphekayo ziye ezikoleni, wathi noma ziya zenza kabi ezifundweni zazo
Uqhube wathi izibalo ziveza ukuthi u-60% wabesilisa uthi ushadile kodwa abesifazane abangu-31% bathi bashadile.
“Ngeke siphoqe abantu ukuthi bashade kodwa kumele benze okuthile ngezingane ngoba yizona ezihlupheka kakhulu.”
Mancane amathuba okungasebenzi kubafundi abaneziqu zasemanyuvesi uma ubaqhathanisa nabanezitifiketi zasema-Technical Vocational Education and Training.
“Izibalo zabangasebenzi beneziqu zasemanyuvesi ziveza ukuthi bawu7%, ezabafunde emakolishi zimi ku-33%. Izinga lokungasebenzi limi ku-27%, linyuke ngo-2% uma uliqhathanisa noFebhuwari 2016.”
Uthe kunabantu abangu-8.9 million asebeyekile ukufuna umsebenzi.
“Kumele kubhekwe izinga lemfundo emakolishi ngoba kukhona abafundi abaphuma nezitifiketi ezingathi shu.”