Kungase kuvalwe inqwaba yezinkampani
KUNGASE kuvalwe izinkampani ezingu-60 ezisebenzela esikhungweni esithuthukisa osomabhizinisi abancane esiseduze kwaseNanda Rank, eThekwini, iSmall Enterprise Development Agency (Seda) njengoba le nhlangano iveze ukuthi ayisenayo imali.
Umphathi wale nhlangano, uMnuz Protas Madlala, uthe ngoJuni uphoqeleke ukuthi asebenzise u-R350 000 ophuma ephaketheni lakhe ukuze lesi sikhungo singavalwa. Uthe emasontweni amabili edlule uphoqeleke ukusebenzisa u-R60 000 ukuze akhokhele izindleko zikagesi obuvalwe nguMasipala weTheku.
“Angisazi ukuthi ngingqongqoze kumiphi iminyango ukuze iSeda ithole uxhaso ngoba ngiyile ehhovisi likandunankulu, elokuthuthukiswa komnotho, ngaya kwaMasipala weTheku ngaphinde ngabhalela noNgqongqoshe wamaBhizinisi amancane uNkk Lindiwe Zulu kodwa bonke bathi imali abanayo,” kusho uMadlala.
Uthe uselitshelile ibhodi lakwaSeda ukuthi uma bengalutholi uxhaso kule nyanga bazophoqeleka ukuthi basivale lesi sikhungo. “Uma singalutholi uxhaso kusho ukuthi amabhizinis angu-60 asebenzela esikhungweni sethu esiseThekwini azovalwa.”UMnuz Linton Mchunu obhekelele ezokuxhumana ehhovisi likaNgqongqoshe wamaBhizinisi amancane uNkk Lindiwe Zulu, uthe ungqongqoshe uzimisele ukusombulula udaba lokungabikho kwemali kwaSeda.
UMnuz Ndabezinhle Sibiya okhulumela uNdunankulu waKwaZulu-Natal uthe uNdunankulu uzibophezele ukusebenzisana nosomabhizinisi futhi uyalazi iqhaza leSeda ekucijeni osomabhizinisi abasafufusa. “Lolu daba sizolulandela siyihhovisi likaNdunankulu ikakhulukazi iPlanning Commission esebenzisana nezinhlaka zosomabhizinisi ukuze luxazululeke.”
Imizamo yokuthola ukuphawula kukaMasipala weTheku naseMnyangweni wezokuThuthukiswa koMnotho, ezokuVakasha neMvelo KwaZulu-Natal ayiphumelelanga njengoba bengayiphendulanga imibuzo abathunyelelwe yona ngama-email.